Derbyniodd Jones y wobr ychydig funudau cyn i'w dîm herio'r Elyrch yn Stadiwm Liberty yng ngem ddarbi de Cymru.

Dyma'r pedwerydd tro i Jones ennill y wobr yn ystod ei gyfnod gyda'r Adar Gleision.

Rheolwr Caerlŷr Nigel Pearson a Billy Davies o Nottingham Forest oedd y ddau arall i'w henwebu am y wobr.

Enillodd Caerdydd 10 pwynt o bedwar gêm yn y Bencampwriaeth fis diwethaf, gydag Abertawe yn cipio 11 o bum gêm.

Mae'r Elyrch ar rediad o naw gêm heb golli, a'r Adar Gleision yn ddiguro mewn chwe gêm.

Y tro diwethaf i Jones ennill y wobr oedd ym mis Hydref y llynedd , ac fe gollodd y gêm nesaf yn erbyn Queens Park Rangers.

Y dyfarnwr ar gyfer y gêm honno oedd Lee Probert, a fo sydd yn y canol brynhawn Sadwrn yn Stadiwm Liberty.