Ymunodd Mourinho, 44, efo Chelsea ym mis Mehefin 2004 gan ennill pencampwriaeth yr Uwchgynghrair yn ei ddau dymor cyntaf wrth y llyw.

Ond mae hi wedi dod i'r amlwg yn ddiweddar nad yw ei berthynas efo perchenog y clwb, Roman Abramovich, wedi bod yn fêl i gyd.

Mae Adran Chwaraeon y BBC wedi cael ar ddeall mai cyn hyfforddwr Israel, Avram Grant, ddaeth i'r clwb yn ystod yr haf fel cyfarwyddwr pêl-droed, fydd yn cymryd yr awenau.

"Bydd cefnogwyr Chelsea'n ysu i gael enw mawr. Maen nhw eisoes wedi clywed enwau fel Didier Deschamps, Guus Hiddink a Fabio Capello yn cael eu crybwyll," meddai.

"Mae (Grant), oedd yn gyfarwyddwr pêl-droed yn Portsmouth cyn symud i Chelsea, yn gyfaill mawr i Abramovich.

"Roedd 'na sôn pan aeth o i Chelsea y byddai o'n fygythiad i Mourinho pe na fyddai pethau'n mynd yn dda."

Cafodd gohebydd pêl-droed BBC Radio 5live, Jonathan Legard, ar ddeall fod Mourinho wedi tecstio sawl un o'r chwaraewyr, gan gynnwys y capten, John Terry, i ddweud ei fod yn gadael.

Yn y cyfamser, cafodd prif weithredwr y clwb, Peter Kenyon, y cadeirydd, Bruce Buck, a chyfaill agos Abramovich, Eugene Tenenbaum, eu galw i Stamford Bridge i drafod y sefyllfa.

A chafwyd cadarnhad ar wefan Chelsea: "Mae Clwb Pêl-droed Chelsea a Jose Mourinho wedi cytuno i wahanu heddiw (dydd Iau)."