Mae'r FIGC wedi gohirio pob un gêm broffesiynol ac amatur penwythnos yma ac maent wedi canslo gêm gyfeillgar Yr Eidal â Romania nos Fercher.

Dywedodd y comisiynydd, Luca Pancalli: "Nid yw'r hyn rydym wedi ei weld heno unrhywbeth i'w wneud â phêl-droed, felly mae pêl-droed Yr Eidal yn dod i stop."

Yn ôl adroddiadau, cafodd Raciti, 38, ei daro gan fom bychan wrth iddo geisio delio â'r brwydro tu allan i'r stadiwm.

Cafodd ei gludo i'r ysbyty ond bu farw o'i anafiadau.

Roedd Pancalli wedi rhybuddio yn gynharach yn yr wythnos bod achosion o drais yn ystod gemau pêl-droed y wlad yn broblem enfawr.

"Nid yw [gohirio'r gemau] am ddiwrnod yn ddigon," ychwanegodd Pancalli. "Heb fesurau llym, ni fyddwn yn gallu chwarae eto.

"Byddwn yn sefydlu comisiwn yn syth i drafod y sefyllfa. Mae'n amhosib i ni barhau fel hyn."

Roedd y gêm rhwng Catania, sydd yn bumed yn Serie A, a Palermo, sydd yn drydydd, wedi cychwyn yn gynnar nos Wener yn dilyn cyngor gan yr heddlu.

Cyn y gêm, cafwyd munud o dawelwch yn dilyn marwolaeth swyddog, Sammartinese - un o glybiau'r is-gynghreiriau - penwythnos diwethaf.

Ond bu'n rhaid oedi wedi hanner awr o'r gêm wedi'r chwaraewyr cael eu heffeithio gan nwy dagrau oedd yn cael ei ddefnyddio gan yr heddlu y tu allan i'r stadiwm.

Dywedodd asiantaeth newyddion ANSA fod yr ymladd wedi dechrau gan nad oedd cefnogwyr Palermo yn gallu cael mynediad i faes Stadio Massimino tan yr ail hanner.

Wedi'r gêm, parhaodd yr ymladd a'r brwydro ar y strydoedd y tu allan i'r stadiwm gyda bron i 100 o bobl yn cael eu trin am anafiadau a chredir bod plismon arall yn dioddef ag anafiadau difrifol.

Ymatebodd prif weithredwr clwb Catania, Pietro Lo Monaco, i'r newyddion o farwolaeth y swyddog trwy ddweud ei fod am adael pêl-droed.