Arweiniodd Puskas dîm euraidd Hwngari yn ystod y 1950au cyn iddo gymryd dinasyddiaeth Sbaenaidd, a llwyddodd i ennill Cwpan Ewrop ar dair achlysur â Real Madrid.

Rhwydodd Puskas 83 gôl mewn 84 gêm i Hwngari rhwng 1945 a 1956 a chwaraeodd dros Sbaen yng Nghwpan y Byd 1962.

FERENC PUSKAS Geni: 2 Ebrill 1927, Bwdapest, Hwngari Clybiau: Kispest Honved (354 gêm, 357 gôl) a Real Madrid (528 gêm, 512 gôl) Gwobrau: Cynghrair Hwngari (5), Cynghrair Sbaen (5), Cwpan Sbaen, Cwpan Ewrop (3), Cwpan Rhyngyfandirol, Medal Aur Olympaidd.

Wedi arwain Hwngari i fedal aur yng Ngemau Olympaidd 1952, roedd yn rhan o dîm enwog y Mighty Magyars drechodd Lloegr 6-3 ym 1953 - y tîm cyntaf o dramor i ennill yn Wembley.

Wedi llwyddo i chwalu Gorllewin yr Almaen 8-3 yn y rownd agoriadol, roedd Hwngari, oedd heb golli gêm ers pedair blynedd ac yn bencampwyr y Gemau Olympaidd, yn ffefrynnau clir ar gyfer Cwpan y Byd 1954 yn Y Swistir.

Ond er iddynt fynd 2-0 ar y blaen yn gynnar yn y rownd derfynol, llwyddodd Max Morlock a Helmut Rahn (2) i sicrhau buddugoliaeth annisgwyl i'r Almaenwyr mewn gêm sy'n cael ei hadnabod fel Das Wunder von Bern (Gwyrth Bern).

Ymunodd Puskas â Real Madrid ac roedd yn aelod allweddol o'r tîm gipiodd llu o bencampwriaethau Sbaen a chwpanau Ewrop.

Rhwydodd bedair gôl wrth i Real chwalu Eintracht Frankfurt 7-3 mewn gêm arbennig yn rownd derfynol Cwpan Ewrop ar Barc Hampden ym 1960.

Rhwydodd 512 gôl i Real mewn 528 gêm ac ym 1962 daeth yn ddinesydd o Sbaen mewn pryd i chwarae dros ei wlad fabwysiedig yng Nghwpan y Byd 1962.