"Dwi wedi fy siomi'n arw," meddai Chopra, sgoriodd yn erbyn yr Elyrch yn y gêm gyfartal 2-2 ar Barc Ninian y tymor diwethaf. "Dyma'r gemau 'da chi eisiau chwarae ynddyn nhw.

"Mae gemau lleol yn golygu dipyn i mi gan fy mod i'n dod o ardal Newcastle a dwi wedi chwarae mewn cymaint o gemau fel hyn - dwi'n meddwl fy mod wedi chwarae mewn saith y tymor diwethaf.

"Dwi wedi chwarae yn erbyn y ddau o dîm o Fryste y tymor yma ac mae colli'r gêm yn erbyn Abertawe yn dipyn o ergyd."

Chopra yw prif sgoriwr y Bencampwriaeth gyda 11 gôl, ond mae gan Gaerdydd opsiwn naturiol i gymryd ei le, sef yr Albanwr Ross McCormack.

Ac ychwanegodd Chopra ei fod yn hyderus y bydd McCormack - sydd wedi colli rhan helaeth o'r tymor gydag anaf - yn gwneud yn fawr o'i gyfle.

"Mae yna fwy i'r tîm nag un chwaraewr," meddai. "Mae yna nifer o chwaraewyr sy'n eistedd ar y fainc ac yn ysu i gael cymryd lle rhywun.

"Ond y peth pwysicaf yw ein bod yn mynd i Abertawe ac yn chwarae ein gêm naturiol a gobeithio nawn ni ennill y tri phwynt."