Ymunodd Monk, sy'n 30 mlwydd oed, gyda'r Elyrch ar gychwyn tymor 2004-05 ar ôl cael ei ryddhau o Southampton wedi wyth mlynedd gyda'r clwb.

Mae'r amddiffynnwr canol wedi sefydlu ei hun fel rhan annatod o'r tîm ers hynny, gan chwarae rôl allweddol wrth helpu'r clwb esgyn o Adran Dau i'r Bencampwriaeth.

"Dwi wrth fy modd yn arwyddo cytundeb newydd," meddai Monk, sydd wedi chwarae 150 o gemau cynghrair i Abertawe.

"Mae hyn yn rhywbeth dwi wedi bod eisiau ei wneud ers talwm. Dwi wrth fy modd yn chwarae i Abertawe a dwi heb ystyried chwarae i unrhyw glwb arall."

Bu'n rhaid i Monk dynnu allan o'r tîm i wynebu Caerdydd ar fyr rybudd ddydd Sadwrn ar ôl anafu ei goes wrth gynhesu cyn y gêm ar Stadiwm Liberty.

Ond mae disgwyl iddo fod yn holliach ar gyfer y gêm nesaf, sef ymweliad Derby County a Stadiwm Liberty ar nos Wener, 20 Tachwedd.

Dywedodd rheolwr Abertawe, Paulo Sousa, fod profiad Monk yn hollbwysig i'r tîm.

"Mae o'n ymwybodol o athroniaeth y clwb a dwi'n falch iawn ei fod wedi ymrwymo ei ddyfodol hirdymor i ni."