Mae'r anafiadau yn debygol o weld Owain Tudur Jones yn cael cyfle i chwarae am y tro cyntaf ers dros fis.

"Dwi'n edrych ymlaen at rediad allan ar y cae gobeithio," dywedodd Jones. "Dyma'r math o gyfleodd mae'n rhaid i mi ddisgwyl amdanyn nhw fel chwaraewr wrth gefn yn y garfan ar hyn o bryd.

"Mae'n rhaid i mi wneud siŵr fy mod i'n profi pwynt mod i'n haeddu bod yn y garfan bob wythnos."

Mae'r amddiffynnwr Fede Bessone ar gael unwaith eto ar ôl gwell o anaf, felly hefyd y chwaraewr canol cae Andrea Orlandi.

Cafodd y gêm wreiddiol ei ohirio ar 3 Ionawr oherwydd bod y cae wedi rhewi, ond nid oes unrhyw amheuaeth y tro yma ar ôl i'r maes basio archwiliad nos Lun.

Mae Histon, sy'n ail yn Uwchgynghrair Blue Square, 64 safle yn is nag Abertawe ym mhyramid pêl-droed Lloegr.

Nid yw'r clwb o Swydd Caergrawnt wedi chwarae gêm gartref ers union i fis.

Bu gryn ffraeo rhwng y ddau glwb ar ôl i'r gêm gyntaf gael ei ohirio, gydag Abertawe yn gwadu honiadau Histon eu bod wedi rhoi pwysau ar y dyfarnwr i beidio caniatáu i'r gêm gael ei chwarae.

Ond ers hynny, mae'r ddwy ochr wedi ymddiheuro am eu sylwadau, gan ategu eu bod yn gobeithio gweld gêm gyfeillgar nos Fawrth.

Bydd yr enillwyr yn wynebu un ai Bristol City neu Portsmouth (sy'n ail-chwarae nos Fawrth) yn y rownd nesaf.