|
Dywed Montgomerie ei fod yn awyddus i gael rhywun wrth ei ochr yn y gêm yn erbyn yr Unol Daleithiau sy'n gyfarwydd iawn gyda chwrs y Celtic Manor, ger Casnewydd. Mae Price, chwaraeodd rhan flaenllaw yn y gystadleuaeth yn y Belfry yn 2002, yn aelod o'r cwrs 2010 ac yn byw yn lleol. A gan fod Ian Woosnam, y capten buddugol yn 2006, eisoes wedi dweud bod ganddo ddim diddordeb i fod yn is-gapten i Montgomerie, yna Price yw' ffefryn i gael ei ddewis.  Mony a Pavin yn chwarae'r cwrs 2010
"Bydd 65 i 70 y cant o'r dorf yma y flwyddyn nesaf yn Gymry, felly mae'n iawn i mi annog rhywun o'r wlad i fod yn is-gapten i mi," meddai Montgomerie ar ôl chwarae naw twll ar gwrs y 2010 yn erbyn capten yr Unol Daleithiau, Corey Pavin. "'Da ni gyd yn gwybod pa mor dda y chwaraeodd Phil yn y Cwpan Ryder yn 2002, ac ar y diwrnod olaf yn enwedig. Mae o yn un o'r bobl dwi'n eu hystyried i fod yn gynorthwyydd i mi. "Hynny ydi, os nad yw'n perfformio'n ddigon da i ennill lle yn y tîm ei hun fel chwaraewr." Mewn gwirionedd, prin iawn yw gobeithio Price i sicrhau lle yn y tîm. Mae'r chwaraewr 42 mlwydd oed yn rhif 976 ar restr detholion y byd, ac mae bron i dair blynedd wedi mynd heibio iddo orffen ymysg y 10 uchaf mewn cystadleuaeth. Ond dywedodd Price ei fod yn hyderus y byddai'n gallu chwarae rôl effeithiol fel is-gapten ym mis Hydref y flwyddyn nesaf. "Dwi'n meddwl y byddwn i'n gallu cynnig rhywbeth o werth i Montgomerie yn ystod yr wythnos," meddai Price. Mae'r Gwyddel Paul McGinley a Thomas Bjorn o Ddenmarc wedi cael eu crybwyll fel dau sy'n sicr o gynorthwyo Montgomerie.
 |
