"Ry' ni o fewn blwyddyn ac mae hi'n anhygoel pa mor gyflym y bydd y flwyddyn yn pasio a 'dwi'n edrych ymlaen at bob eiliad," meddai Montgomerie.

Dywedodd Montgomerie mai trefnu cyfarpar a llety ar gyfer tîm Ewrop fu'n ei gadw'n brysur hyd yn hyn.

Ond yn awr fe fydd yn troi ei olygon at y chwaraewr hynny fydd yn cynrychioli Ewrop yn y Celtic Manor.

Fe fydd Montgomerie, a chapten yr Unol Daleithiau Corey Pavin, yn cyhoeddi eu timau erbyn diwedd Awst y flwyddyn nesaf.

Ac mae Montgomerie wedi dweud yr hoffai weld chwaraewyr Ewrop yn cystadlu ym Mhencampwriaeth Golff Agored Cymru ar gwrs y Twenty Ten.

"Fe fyddai'n fuddiol iddynt i gystadlu... ac i ddangos i mi be alle nhw ei wneud ar gwrs y Cwpan Ryder," ychwanegodd Montgomerie.

Dywedodd Montgomerie yr hoffai weld Cymro yn sicrhau ei le yn nhîm Ewrop y flwyddyn nesaf.

Phil Price oedd y Cymro diwethaf i gynrychioli Ewrop a hynny yn 2002 pan oedd yn aelod o'r tîm enillodd yn y Belfry.

"Byddai'n bechod cael Cwpan Ryder yng Nghymru heb gynrychiolaeth o Gymru," meddai capten Ewrop.

"Dwi'n dymuno'n dda iddynt.. byddai'n wych cael Cymro yn aelod o'r tîm."