Roedd y Cymro yn pwyso trwy gydol y rownd olaf yn enwedig wrth droi pan suddodd eryr a thri byrdi mewn pum twll.

Ond er i Dredge fynd ar y blaen ar un cyfnod fe lwydodd Noren i gamu yn ôl i'r brig ar ôl iddo suddo o'r byncer ar y 15fed twll.

Fe fydd yr ail safle yn gymorth i Dredge wrth iddo gasglu pwyntiau gwerthfawr yn y gystadleuaeth gyntaf o'r tymor i gyfrif tuag at y safleoedd yn nhîm Cwpan Ryder Ewrop.

"Mae hi wedi bod yn sbel ers i mi fod ymysg y ceffylau blaen mewn cystadleuaeth fel roedd hi'n braf bod yn ei chanol hi," dywedodd Dredge.

"Nes i berfformio'n dda. Mi faswn i'n gallu meddwl y dylwn i wedi neud ambell i beth yn well ond dwi'n ddigon bodlon. Mae ail yn well na thrydydd fel dwi wedi bod yn ei ddweud."

Roedd hi'n bythefnos llwyddiannus i Gymro arall hefyd wrth i Rhys Davies ennill cystadleuaeth ar Gylchdaith Her Ewrop.

Sicrhaodd Davies fuddugoliaeth o un ergyd yn y Fred Olsen Challenge de Espana diolch i rownd olaf o 67.

Mae'r fuddugoliaeth, sef ei ail o'r tymor ar y Gylchdaith, yn ei godi i'r chweched safle ar y rhestr enillion. Mae Cymro arall, Sion Bebb, yn yr unfed safle ar bymtheg.

Bydd y 20 uchaf yn ennill yr hawl i chwarae ar brif Gylchdaith Ewrop y tymor nesaf.