Dywedodd y cadeirydd Paul Russell y bydd adolygiad trylwyr o dymor siomedig Morgannwg yn cael ei gwblhau yn fuan.

Ond mae James, cyn gapten Morgannwg, yn credu bod Maynard wedi gwneud gwaith da gyda'r Sir Gymreig.

"Fy marn i yw y dylai Matthew Maynard barhau," meddai James wrth BBC Cymru.

"'Dwi ddim yn meddwl y dylai hyn gael ei drafod yn gyhoeddus a tydw i ddim yn gwybod be' mae'r cadeirydd yn ceisio ei gyflawni gyda'r sylwadau hyn.

Ychwanegodd James, sydd bellach yn ohebydd criced gyda'r Sunday Telegraph, y bu'n rhaid i Maynard ail-adeiladu'r garfan.

"Ni fu'r tim yn un da ers sawl blwyddyn ac fy nghwyn i yw na fu digon o bwyslais ar y tim ers cryn amser," meddai James.

"O'n safbwynt i mae'n dda bod y cadeirydd yn dangos diddordeb yn y tîm o'r diwedd.

"Pan gydiodd Mathew Maynard yn awenau'r tîm - ac mae wedi bod yno dwy flynedd - roedde nhw'n shambyls.

"Bu gwelliant eleni, yn sicr yn y gêm pedwar diwrnod er dyw'r gemau undydd heb fod gystal.

"Fy ngobaith ar gyfer y flwyddyn nesaf yw y bydd y tîm undydd yn gwella a bod y tîm pedwar diwrnod yn parhau i ddatblygu."