A phan ofynnwyd i'r cadeirydd os oedd dyfodol Maynard wrth y llyw yn ddiogel, dywedodd Russell: "Rydych chi mor dda â'ch set ddiwethaf o ganlyniadau.

"Mae'r canlyniadau wedi bod yn hynod siomedig a dyna beth fydd Matthew, a finnau, ac Alan Hamer [y prif weithredwr] yn eu trafod yn fanwl."

Un o brif rwystredigaethau Russell, meddai, yw methiant nifer o'r chwaraewyr i wireddu eu potensial.

A dywedodd bod gormod o gyfleodd i ennill gemau yn y Bencampwriaeth wedi cael eu gwastraffu ar y diwrnod olaf.

"Rydym ni wedi bod yn dîm aflwyddiannus am bum mlynedd a dros y bum mlynedd yna rydym ni wedi ennill, ar gyfartaledd, 17% o'r gemau... nid yw hynny ddigon da," meddai Russell.

"Mae'r aelodau a'r cefnogwyr yn anniddig iawn, mae'r sach llythyrau yn llawn bob wythnos."

Russell benododd Maynard wrth y llyw dros ddwy flynedd yn ôl, a mynnodd ei fod yn parhau yn ffyddiog yng ngallu'r hyfforddwr i arwain y tîm i lwyddiant.

"Matthew oedd fy newis i, a dwi'n credu ei fod o'n hyfforddwr criced talentog iawn," meddai.

"Mae ei wybodaeth am y gêm a'i weledigaeth dechnegol wastad yn fy synnu i.

"Mi wn ei fod yn rhannu fy rhwystredigaethau i ynglŷn â ffaeleddau amlwg rhai o'r chwaraewyr.