Dodd yn sicrhau buddugoliaeth
28 Tachwedd 2004
Llwyddodd y Cymro, Stephen Dodd, i sicrhau ei fuddugoliaeth gyntaf ar y Gylchdaith Ewropeaidd wrth gipio Pencampwriaeth Agored China yn Shanghai o dair ergyd.
Gwnaeth Dodd, orfennodd 12 ergyd yn well na'r safon, ddigon i gadw ar y blaen i Thomas Bjorn o Ddenmarc yn y rownd olaf.
Cafodd y chwaraewr 38-mlwydd-oed fraw ar y 17ed twll wedi iddo gymryd tair ergyd i dyllu, ond methodd Bjorn â chymryd mantais wrth iddo wneud smonach o'r 18ed twll.
Rhannodd Chawalit Plaphol, Thaworn Wiratchant a Jason Dawes y trydydd safle.
"Yr unig beth oeddwn eisiau wneud oedd mynd allan a gwneud fy ngorau glas, a dyna beth ddigwyddodd," meddai Dodd. "Rwy'n ffodus mai fy nhro i oedd i chwarae'n dda."
Dyma fuddugoliaeth gyntaf Dodd mewn 166 twrnament ers troi'n broffesiynol ym 1989.
"Roeddwn yn credu byddwn yn ennill mewn amser," meddai.
"Yn amlwg mae wedi cymryd hirach na'r oeddwn yn ei ddisgwyl.
"Nid oeddwn erioed yn meddwl nad oeddwn yn ddigon da. Petawn yn meddwl hynny byddwn wedi wedi rhoi'r ffidil yn y to amser maith yn ôl."
Dywedodd Bjorn, orffennodd yn yr ail safle am yr ail bencampwriaeth yn olynol, ei fod yn hapus i frwydro unwaith eto.
"Mae rhywun eisiau ennill pencampwriaethau golff, ond pan mae rhwyun yn erbyn gwr sydd yn chwarae cystal â Stephen, mae'n rhaid i rhywun ddweud da iawn."
