Smith eisiau cefnogaeth y Cymry
08 Mawrth 2005
Mae rheolwr Wrecsam, Denis Smith, wedi galw ar Gymru gyfan i gefnogi'r Dreigiau yn rownd derfynol Tlws yr LDV yn Stadiwm y Mileniwm ar 10 Ebrill.
"Bydd yn ddiwrnod gwych i bêl-droed Cymreig," meddai Smith wedi ei dîm drechu Oldham 6-3 dros ddau gymal.
"Byddwn yn hoffi gweld cefnogwyr Caerdydd ac Abertawe a phobl o'r canolbarth yn dod draw i'n cefnogi.
"Mae'n hyfryd cyrraedd unrhyw rownd derfynol, ond bydd mynd â chlwb Cymreig i'r Mileniwm y arbennig."
A chredai Smith fod y fuddugoliaeth am ysbrydoli ei garfan i esgyn o waelodion y gynghrair, gan ddechrau wrth groesawu Oldham yn ôl i'r Cae Ras ddydd Sadwrn."Roeddem yn llawn haeddu ennill ac mae'n hwb i'r chwaraewyr wrth i ni baratoi am ddiwrnod mawr arall ddydd Sadwrn."
A roedd is-reolwr y clwb, Kevin Russell, hefyd yn credu fod y fuddugoliaeth am fod yn hwb enfawr i'r garfan.
Dywedodd wrth Adran Chwaraeon BBC Cymru: "Rydym yn haeddu'r fuddugoliaeth, rwyf mor falch dros yr hogia a byddwn yn gallu mynd (i Stadiwm y Mileniwm) a mwynha'r diwrnod.
"Mae'r blynyddoedd diwethaf wedi bod yn anodd iawn ond i fod yn deg i'r chwaraewyr maent wedi bod yn wych.
"Dim ond un colled rydym wedi ddioddef mewn 13 gêm a rwy'n ffyddiog gallwn osgoi disgyn allan o'r adran," ychwanegodd.
Roedd capten y clwb, Brian Carey, hefyd wrth ei fodd wedi'r canlyniad nos Fercher.
"Mae'n noson wych," meddai'r amddiffynnwr canol, sydd wedi anafu ar hyn o bryd.
"Nid oes unrhyw reswm pam na gallwn drechu (Oldham) ddydd Sadwrn, rwy'n sicr ein bod â'r gallu i aros i fyny."
