|
Anrhydedd i Ronaldinho
20 Rhagfyr 2004
Ymosodwr Barcelona, Ronaldinho, gipiodd gwobr Chwaraewr y Flwyddyn Fifa am 2004.
Llwyddodd y gwr 24-mlwydd-oed i ennill ar draul Thierry Henry o Arsenal ac ymosodwr AC Milan, Andriy Shevchenko.
Ronaldinho enillodd y bleidlais gan hyfforddwyr a chapteiniaid timau rhyngwladol gyda 620 pwynt, tra bo Henry â 552 gyda Shevchenko yn casglu 253.
"Mae bod yma yn dod â boddhad mawr i mi. Mae'n fuddugoliaeth wych, gan nad wyf wedi bod yn sgoriwr da erioed," meddai Ronaldinho.
"Ond rydym yn chwarae yn ein ffordd ein hunain a roedd y tri ohonom yn haeddu ennill. Rwyf yn hapusach fyth fy mod wedi ennill. "Mae'n rhaid i mi ddiolch i fy nghyd chwaraewyr yn Barcelona gan na fyddwn wedi ennill hebddynt." Mae'r wobr yn cael ei chyflwyno ar sail pleidlais hyfforddwyr y 157 o gymdeithasau pêl-droed Fifa ac, am y tro cyntaf eleni, 145 o gapteiniaid rhyngwladol. Cafwyd pum pwynt am enwebiad yn y safle cyntaf, tri am fod yn ail ac un am fod yn drydydd. Cafodd Ronaldinho 89 pleidlais cyntaf, Henry 79 a Shevchenko 34. Birgit Prinz o'r Almaen gipiodd gwobr y merched am yr ail flwyddyn yn olynol gyda Brasil yn ennill gwobr Tîm y Flwyddyn a China yn cael eu henwi'r tîm sydd wedi gwella fwyaf yn ystod y flwyddyn.
|
