Gwlad Pwyl 1-2 Lloegr
08 Medi 2004
Sgoriodd Jermain Defoe i Loegr wrth iddynt drechu Gwlad Pwyl 2-1 yn Katowice.
Daeth yr ymosodwr o Spurs i fewn i'r tîm yn lle Alan Smith ar gyfer gêm rhagbrofol Cwpan y Byd gyda Paul Robinson yn cymryd lle David James yn y gôl.
Ergydiodd Defoe yn wych i roi'r ymwelwyr ar y blaen ar ôl 36 munud ond unionwyd y sgôr pan daniodd Maciej Zurawski yn nerthol i gefn y rhwyd.
Rhwydodd Lloegr eto ar ôl 57 munud wrth i ergyd Ashley Cole wyro yn erbyn Arkadiusz Glowacki a heibio Jerzy Dudek yn y gôl.
Mae Defoe wedi edrych yn gyfforddus ar y lefel rhyngwladol ond fe wastraffodd gyfle da ar ôl 20 munud.Fe ddaeth y bêl iddo yn dilyn cyd-chwarae da rhwng Wayne Bridge a Cole ond fe ergydiodd yr ymosodwr heibio'r gôl.
Fe wnaeth yn iawn am hynny naw munud cyn yr egwyl wrth iddo droi yn fedrus yn dilyn pas gan David Beckham cyn tanio heibio Dudek ac i gefn y rhwyd.
Roedd yr amseriad yn berffaith oherwydd roedd Lloegr wedi colli'r amddiffynnwr Gary Neville munudau yn gynt oherwydd iddo dderbyn anaf.
Daeth Jamie Carragher ymlaen yn ei le.
Fe chwaraeodd Gwlad Pwyl yn well ar ôl ildio gan roi pwysau ar yr ymwelwyr am weddill yr hanner.
Fe ddaeth y gôl iddyn nhw tri munud i fewn i'r ail hanner wrth i Zurawski ergydio heibio Robinson yn dilyn pas gan Kamil Kosowski.
Ond nid oedd amser i'w ddathlu wrth i Loegr fynd ar y blaen eto ar ôl 57 munud wrth i Cole ergydio i'r rhwyd oddi ar Glowacki.
Parhaodd yr ymwelwyr i ymosod a daeth Bridge a Michael Owen yn agos i sgorio.
Gwlad Pwyl: Dudek, Mila, Rzasa, Zewlakow, Glowacki, Bak, Rasiak, Krzynowek, Zurawski, Lewandowski, Kosowski.
Eilyddion: Boruc, Klos, Kukielka, Baszcyznski, Niedzielan, Gorawski, Smolarek.
Lloegr: Robinson, Neville, Terry, King, Ashley Cole, Beckham, Lampard, Gerrard, Bridge, Defoe, Owen.
Eilyddion: Carragher, James, Hargreaves, Dyer, Wright-Phillips, Smith, Vassell.
Dyfarnwr: Stefano Farina (Yr Eidal)
