|
Uefa yn clirio McGuigan
07 Awst 2005
Mae golwr Y Rhyl, Gerard McGuigan, wedi ei gael yn ddieuog o unrhyw gamymddwyn yn ystod y ffrwgwd ar ddiwedd y gêm ag Atlantas yng Nghwpan Uefa fis diwethaf.
Roedd McGuigan yn wynebu cyhuddiad o ymddygiad amhriodol wedi cael ei gyhuddo o herio rheolwr Atlantas.
Dioddefodd drwyn gwaed wrth i Vacys Lekevicius ymateb yn chwyrn i golled ei dîm a gwrthdaro â chwaraewyr Y Rhyl.
Ond mae pwyllgor disgyblu Uefa wedi cael McGuigan yn ddieuog sydd yn caniatau'r golwr i wynebu FK Viking yn yr ail rownd ragbrofol nos Iau.
Bydd Lekevicius yn wynebu pwyllgor disgyblu ar 18 Awst wedi cael ei gyhuddo o ymddygiad treisgar.
Carlamodd i'r maes ar ddiwedd y gêm ac ymddengys ei fod wedi taro chwaraewr canol cae Y Rhyl, Alan Morgan.
Collodd Y Rhyl y gêm yn Lithiwania 3-2 ond cawsant gamu ymlaen i'r ail rownd ragbrofol diolch i'r rheol goliau oddi cartref.
|
