16 Ionawr 2005

Dechreuodd Jiws ei yrfa â Phorthmadog gan rwydo chwe gôl yn nhymor cyntaf Cynghrair Cymru ym 1992/93.

Wedi dau dymor ar Y Traeth symudodd i Ffordd Farrar ac mewn chwe tymor welodd Lloyd-Williams yn chwarae 152 o gemau, rhwydodd 130 o goliau.

Daeth uchafbwynt ei yrfa yn 2001/02 pan rwydodd 47 gôl - cyfanswm oedd yn sicrhau mai Lloyd-Williams oedd prif sgoriwr holl gynghreiriau Ewrop.

Rhwydodd ei gôl gyntaf yn y gynghrair i Borthmadog mewn gêm gyfartal 1-1 yng Nglyn Ebwy y nhymor agoriadol y Gynghrair Genedlaethol ym 1992/93.

Ond yn amlwg, nid oedd wedi gwneud argraff mawr gan nad yw'n cofio'r gôl.

"I fod yn onest, tydw i ddim yn cofio llawer ar y goliau 'dwi'n sgorio," chwarddodd.

"Nid wyf yn cyfri fy ngoliau, ond mae pawb wedi bod yn dweud fy mod yn agos (i'r 200) ers fis Tachwedd," meddai Lloyd-Williams wrth BBC Cymru'r Byd.

"Mae'n braf sgorio pob gôl, ond efallai ei fod yn felys fy mod wedi cyrraedd 200 yn erbyn Caernarfon," ychwanegodd y gwr o Lanberis, dreuliodd gyfnod hir â Bangor, gelynion pennaf y Canaries.

"Yr unig beth sydd yn siom yw fy mod heb sgorio yn Ewrop, ond dwi'n gobeithio gallu gwneud hynny tymor nesaf!"

Ystadegau Marc Lloyd-Williams