Hughes yn clodfori Savage
15 Mawrth 2005
Mae rheolwr Blackburn Rovers, Mark Hughes, wedi datgan mai Robbie Savage yw'r chwaraewr Cymreig gorau yn y blynyddoedd diweddar.
Cyhoeddodd Savage ei fod yn ymddeol o bêl-droed rhyngwladol wythnos yma wedi olynydd Hughes fel rheolwr y tîm cenedlaethol, John Toshack, ei adael allan o'r garfan i herio Awstria.
Dywedodd Hughes wrth BBC Radio Five Live mai Savage oedd y chwaraewr pwysicaf i Gymru yn ystod ei deyrnasiad fel rheolwr Cymru.
"Yn ystod fy amser i wrth y llyw â Chymru, roeddwn yn ffodus iawn i gael Robbie yn y garfan - ac am bum mlynedd fo oedd y chwaraewr gorau yn y tîm.
"Mae Robbie wedi gwneud ei benderfyniad a rwy'n credu fod rhaid i bawb barchu hynny yn ogystal â'r hyn mae wedi wneud i bêl-droed yng Nghymru."Wrth edrych ar y sefyllfa o safbwynt bersonol, bydd yn gallu canolbwyntio ar Blackburn a rydym yn falch o hynny."
Mae Savage wedi beirniadu Toshack yn gyhoeddus wedi iddo gael ei adael allan o'r garfan fydd yn herio Awstria ddwywaith o fewn wythnos ar ddiwedd y mis.
Dywedodd y chwaraewr canol cae fod teyrnasiad Toshack yn "shambles" ac mae'n benderfynol na fydd yn newid ei benderfyniad i ymddeol.
Roedd Hughes eisiau ymbellhau o'r sylwadau am allu rheoli Toshack ond cyfaddefodd: "Mae'n siomedig i bêl-droed Cymreig fod hyn wedi digwydd.
"Nid oes gan Gymru nifer fawr o chwaraewyr o safon Robbie Savage a rwy'n siomedig na fydd chwaraewyr o'i allu ar gael i Gymru."
