Speed yn ymddeol
13 Hydref 2004
Mae Capten Cymru Gary Speed wedi penderfynu ymddeol o bêl-droed rhyngwladol yn dilyn y golled 3-2 yn erbyn Glad Pwyl nos Fercher.
"Mae'r amser yn iawn i roi'r gorau iddi," meddai Speed, 35, sydd wedi ennill 85 o gapiau dros ei wlad.
"Mi fydd hi'n anodd i ni ennill ein lle yng Nghwpan y Byd felly ni fyddai'n briodol i mi barhau.
"Mae'n amser i rhywun fengach ddod i mewn ar gyfer y gemau rhagbrofol nesaf. Rwyf wedi cael gyrfa wych a rwyf wedi mwynhau pob eiliad."
Mae Speed wedi ei gysylltu â swydd rheolwr Cymru ers i Mark Hughes adael i ymuno â Blackburn Rovers.
Ond mynnodd na fyddai'n gwneud cais am y swydd ond byddai'n "siarad â'r FAW petai rhywun yn cysylltu â mi".
Mae gan Speed ddwy flynedd yn weddill ar ei gytundeb â Bolton Wanderers ac mae ei reolwr, Sam Allardyce, wedi erfyn arno i ganolbwyntio ar ei yrfa fel chwaraewr.
Ond dywedodd Mark Hughes, wrth ddod â'i yrfa rhyngwladol fel chwaraewr a rheolwr Cymru i ben wedi 21-mlynedd, bod Speed â'r gallu i fod yn reolwr Cymru.
Mae chwaraewr canol cae Cymru, Robbie Savage, eisoes wedi datgan mai Speed ddylai fod y rheolwr nesaf, ynghyd â rheolwr profiadol fel Brian Flynn.
"Gary a Brian Flynn ddylai gael y swydd - mae pawb yn y garfan eisiau Gary gymryd yr awenau," meddai.
