Cymru 2-2 Gogledd Iwerddon
08 Medi 2004
Cafodd Gogledd Iwerddon gêm gyfartal 2-2 yn erbyn Cymru er chwarae ag un dyn yn llai am gyfnod hir o'r gêm ragbrofol Cwpan y Byd 2006 yng Nghaerdydd.
Mewn gêm danllyd cafodd Robbie Savage a Michael Hughes eu gyrru am gawod gynnar wedi wyth munud yn unig.
Sgoriodd Jeff Whitley ac yna David Healy i'r ymwelwyr cyn i Healy dderbyn dau gerdyn melyn am ddathlu mewn ffordd amhriodol.
Daeth Cymru yn ôl â goliau gan John Hartson wedi 31 munud, a'r eilydd, Rob Earnshaw, wedi 74 munud.
Dechreuodd Gogledd Iwerddon yn dda gan roi pwysau ar amddiffyn Cymru.Ond cafodd y gêm ei newid yn gyfan gwbwl ar ôl wyth munud wedi Savage redeg â'r bêl o'i hanner ei hun.
Cafodd ei lorio â thacl flêr gan Hughes ond cododd o'r llawr i geisio ymateb cyn i'r chwaraewr o Ogledd Iwerddon ei wthio yn ôl i lawr.
Penderfynodd y dyfarnwr yrru'r ddau oddi ar y cae - y tro cyntaf i Savage weld y cerdyn coch yn ei yrfa.
Dau funud yn ddiweddarach peniodd James Collins y bêl i lwybr Whitley a sgoriodd yntau â tharan o ergyd â'i droed dde.
Cafodd Cymru gyfleon i unioni'r sgôr drwy Jason Koumas a Ben Thatcher ond dyblwyd mantais yr ymwelwyr wrth i Collins lithro a chaniatau Healy i fynd drwodd un am un â'r golwr, Paul Jones.
Cododd yr ymosodwr y bêl dros Jones a phenio i'r rhwyd.
Wrth ddathlu ciciodd Healy y fflag gornel cyn codi ei fraich at y dorf.
Penderfynodd y dyfarnwr ei fod yn haeddu cerdyn melyn am y ddau beth a fe'i anfonwyd o'r maes.
Gyda dyn ychwanegol, penderfynodd Mark Hughes ddod â Rob Earnshaw ymlaen gan eilyddio Mark Delaney.
Daeth gôl i Gymru wedi cyfnod hir o bwysau wrth i Hartson benio yn fedrus i gornel y rhwyd yn dilyn croesiad effeithiol gan Craig Bellamy.
Cafodd Earnshaw a Hartson gyfleon eraill cyn yr egwyl ond, yn amlach na pheidio, roedd y bas olaf yn un gwan.
Yn yr ail hanner bu bron i Tony Capaldi gosbi Cymru am ymosod yn ormodol ond llwyddodd Jones i arbed ei ergyd.
Mentrodd Mark Hughes ymhellach wrth ddod â'r asgellwr Paul Parry i'r maes yn lle'r cefnwr, Ben Thatcher, a talodd ar ei ganfed wrth i Gymru i unioni'r sgôr ar ôl 74 munud.
Croesodd John Oster o'r dde a peniodd Earnshaw heibio Maik Taylor yn y gôl - ei wythfed gôl mewn 15 gêm rhyngwladol.
Bu bron i Gymru ennill y gêm gyda tri funud yn weddill ond ergydiodd Collins heibio'r postyn yn dilyn croesiad Bellamy ar draws wyneb y gôl.
Mae'r canlyniad yn golygu mai dim ond dau bwynt sydd gan Cymru o'u dwy gêm gyntaf yn Grwp 6, lle'r oedd Hughes wedi disgwyl i'w dîm gasglu chwech.
Cymru: Jones, Delaney, Collins, Gabbidon, Thatcher, Oster, Savage, Speed, Koumas, Bellamy, Hartson.
Eilyddion: Melville, Page, Parry, Pembridge, Taylor, Earnshaw, Crossley.
Gogledd Iwerddon: Taylor, Aaron Hughes, Murdock, Williams, Capaldi, Johnson, Clyde, Whitley, Michael Hughes, Healy, Quinn.
Eilyddion: Carroll, Craigan, Jones, Smith, McVeigh, Elliott, McCartney.
Dyfarnwr: Domenico Messina (Yr Eidal)
