Cwpan y Byd, 2006 - Grwp 6
Wedi Cymru ddod allan o'r het i herio Lloegr, Gogledd Iwerddon, Gwlad Pwyl ac Awstria yng ngemau rhagbrofol Cwpan y Byd 2006, mae BBC Cymru'r Byd yn cymryd golwg ar record Cymru yn erbyn y gwledydd dros y blynyddoedd.
Cymru v Lloegr
Er fod Cymru wedi chwarae 97 o gemau yn erbyn yr 'hen elyn', mae 19 mlynedd ers i'r ddwy wlad gwrdd ar y maes pêl-droed.
Ar 2 Mai, 1984 roedd chwaraewr ifanc o glwb Manchester United yn gwneud ei ymddangosiad cyntaf i Gymru, a llwyddodd i sgorio unig gôl y gêm. Bellach, wedi sgorio cyfanswm o 16 gôl mewn 72 ymddangosiad, mae Mark Hughes yn rheoli ei wlad.
Daeth y gêm gyntaf rhwng y ddwy wlad ar y Kennington Oval, Llundain ym 1879 gyda'r Saeson yn fuddugol 2-1, ond bu rhaid disgwyl hyd at 1881 am fuddugoliaeth cyntaf Cymru wrth iddynt drechu Lloegr 1-0 yn Blackburn.
O'r 97 gêm, mae Cymru wedi ennill 14, Lloegr wedi ennill 62 a chyda 21 o gemau cyfartal.
Cymru v Gwlad Pwyl
Y tro cyntaf i Gymru gwrdd â Gwlad Pwyl oedd yn ystod gemau rhagbrofol Cwpan y Byd 1974 oedd hefyd i'w cynnal yn yr Almaen.
Rhyfedd ddigon, yn ymuno â Chymru a Gwlad Pwyl yn y grwp oedd Lloegr.
Wedi trechu Gwlad Pwyl ar Barc Ninian 2-0 diolch i goliau gan Leighton James a Trevor Hockey, roedd siom i Gymru yng Ngwlad Pwyl wrth golli 3-0 yn Chorzw.
I rwbio halen yn y briw cafodd Hockey ei hel o'r maes yn ystod y gêm - y Cymro cyntaf i weld cerdyn coch mewn gêm ryngwladol.
Yn ystod gemau rhagbrofol Cwpan y Byd 2002 llwyddodd gwyr Mark Hughes i sicrhau gêm ddi-sgôr yng Ngwlad Pwyl, ond er i Nathan Blake roi Cymru ar y blaen yn Stadiwm y Mileniwm, colli oedd yr hanes wrth i Wlad Pwyl rwydo ddwywaith i sicrhau'r fuddugoliaeth.
Mae'r ddwy wlad wedi cwrdd ar un achlysur arall mewn gêm gyfeillgar ddi-sgôr n Radom, Gwlad Pwyl ym 1991.
Cymru v Awstria
Mae Cymru wedi cwrdd ag Awstria ar bump achlysur - y tro diwethaf mewn gêm gyfeillgar yn Vienna ym 1992. Chris Coleman sgoriodd y gôl i'r ymwelwyr ar ei ymddangosiad cyntaf dros Gymru, er mwyn sicrhau gêm gyfartal 1-1.
Yn ôl yn y 1970au roedd Awstria yn yr un grwp rhagbrofol â Chymru ar gyfer Pencampwriaethau Ewrop 1976.
Llwyddodd Arfon Griffiths i sgorio unig gôl y gêm ar y Cae Ras i sicrhau fod Cymru yn gorffen ar frig y grwp ac yn camu ymlaen i herio Yugoslavia yn rownd yr wyth olaf.
Dyma unig fuddugoliaeth Cymru dros Awstria, wedi 2-1 colli yn Vienna yn gynharach yn y grwp, ac wedi colli ddwywaith mewn gemau cyfeillgar yn y 1950au.
Cymru v Gogledd Iwerddon
Nid yw Cymru wedi wynebu Gogledd Iwerddon ers gêm gyfartal 1-1 ym Mhencampwriaeth Gwledydd Prydain ym 1984.
Roedd y ddwy wlad yng ngrwpiau rhagbrofol Cwpan y Byd 1950 a 1954 wedi Fifa benderfynu byddai Pencampwriaeth Gwledydd Prydain yn cyfri fel grwp rhagbrofol i Gwpanau'r Byd yn Uruguay a Gorllewin yr Almaen.
Methodd Cymru ac ennill unrhyw un o'r gemau.
Wedi cwrdd ar 90 achlysur, mae Cymru wedi ennill 42 gêm gan golli 27 a chyda 21 gêm gyfartal.
Cymru v Azerbaijan
O'r timau yng ngrwp 6, bydd cefnogwyr a chwaraewyr Cymru yn fwy cyfarwydd ag Azerbaijan nac unrhyw un o'r gwledydd eraill, wedi cwrdd â'r Azeri yn ystod rowndiau rhagbrofol Ewro 2004.
Wedi eu trechu 2-0 yn Baku, llwyddodd Craig Bellamy i sgorio wedi 15 eiliad yn unig i roi Cymru ar y ffordd i fuddugoliaeth swmpus 4-0 yn Stadiwm y Mileniwm.
