Maffia Mr Huws

Maffia Mr Huws

Bois o Fethesda yn byw ac yn bod y bywyd roc a rôl. Llun: GanMed64.

Dwi'n siwr bod rhywbeth yn y dŵr ym Methesda.

Dyma chi ardal sydd wedi cynhyrchu nifer o enwogion y byd roc yng Nghymru: Celt, Jackie Williams, Lleuwen Steffan a llawer mwy, ond y mwyaf adnabyddus mae'n siwr gen i yw Maffia Mr Huws, neu Maffia fel mae pawb yn eu adnabod nhw heddiw.

Mae'r stori'n dechrau nôl ar ddiwedd y 70au pan ddaeth y brodyr Sion a Gwyn Jones at ei gilydd gyda Deiniol Morris a Guto Orwig i ffurfio grŵp o'r enw Weiran Bigog. Yna ym 1981 ymunodd Hefin Huws yn lle Guto Orwig, newidwyd yr enw, a ganwyd Maffia Mr Hughes.

Bu'r band yn gweithio'n galed o gwmpas Bethesda ac yna ym 1982 fe recordiodd Maffia y gân Ffrindiau ar gyfer record hir Sesiwn Sosban (Sosban oedd rhaglen roc Radio Cymru ar y pryd, yn darlledu bob bore Sadwrn). Fe ddaeth hi'n amlwg bod dyfodol mawr i'r band a chyn hir dyma nhw'n cyhoeddi eu record sengl gyntaf, Gitar yn y To, hefyd ym 1982.

Roedd y bois yn byw gyda'i gilydd mewn bwthyn ym Methesda - yn byw'r bywyd roc a rôl ac yn gweithio'n rhyfeddol o galed, yn perfformio mewn mwy na 100 o gigs y flwyddyn. Roedd gan y band ddilyniant anhygoel gyda'r "Maffia Maniacs" yn dilyn y band i bob man ac yn gofyn yn gyson am glywed eu caneuon ar y radio.

Fe fu'r band yn fuddugol ddwywaith yn Noson Gwobrwyo Cylchgrawn Sgrech wrth ennill y wobr am y record orau, a'r anrhydedd o ennill tlws prif grwp roc Cymru ym 1983. Nhw aeth â'r wobr am brif grwp roc y flwyddyn eto ym 1984.

Yng nghanol yr wythdegau fe ymunodd Alan Edwards â'r band i chwarae'r allweddellau, ond yn anffodus, ym 1987, fe laddwyd Alan mewn damwain car yn Llydaw. Ym 1986 bu'r band yn teithio gyda Geraint Jarman a'r Cynganeddwyr ar "Taith y Carcharorion". Roedd y daith yn un o uchafbwyntiau'r byd roc y flwyddyn honno gan gadarnhau perthynas agos iawn rhwng y band a'r Cynganeddwyr.

Wedi i Hefin Huws benderfynu mynd i fyw i Lundain fe gariodd Maffia i fynd gyda Neil Williams yn canu, ac yn achlysurol fe fyddai John Doyle, Martin Beatty, Kevin Roberts a Les Morrison yn dod i'r adwy. Chwaraeodd y band yng ngŵyl y Faenol yn 2000 ac eto yn 2008.

Mae Maffia wedi cyhoeddi naw record a chasét, a CD o oreuon Maffia yn 2008. Y peth pwysig i'w gofio am gyfraniad Maffia yw mai dyma grŵp o fois go iawn oedd yn canu ac yn cyfansoddi o'r galon am bethau oedd o bwys iddyn nhw ac i bobl ifanc Cymru. Wedi'r cwbwl, dyma gyfnod Thatcher a Reagan pan oedd digon o ddeunydd ar gyfer caneuon di-ri.

Mewn cyfnod pan fu nifer o grwpiau adnabyddus Cymru yn deillio o'r colegau neu'r cyfryngau roedd Maffia'n wahanol - bois o Fethesda yn byw ac yn bod y bywyd roc a rôl go iawn ac mae hynny'n dangos yn y caneuon gwych.

Dyma ni bellach yn 2009 a dyw'r stori ddim ar ben eto. Mae Maffia wedi bod nôl yn y stiwdio, felly pwy a ŵyr, mae'n bosib bod mwy i ddod eto gan un o'r grwpiau roc pwysicaf a welwyd erioed yn y byd roc yng Nghymru. Gwyliwch y gofod...

Richard Rees

Adolygiadau

Adolygiad CD Maffia Mr Huws

08 Medi 2008

Beth yw barn yr adolygwyr am Maffia Mr Huws - Croniclau'r Bwthyn?

Eraill

Jeni Lyn ar C2

Y newyddion cerddorol diweddaraf, gan gynnwys newyddion am raglen Ysgol Roc, albym a thaith Richard James, Gwyl Bae Cemaes a llawer mwy...


[an error occurred while processing this directive]

C2

C2 - gigs

Rhestr gigs

Pwy sydd yn chwarae lle a pryd? Rhestr gigs C2

BBC Wales Music

Sian Evans

More Music by Welsh artists

Take at look at our musical profiles of all kinds of artists from across the country.

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.