Yn y tri mis diwethaf mae'r arweinydd Gregory Roberts a'i aelodau wedi ymddangos ar amryw lwyfannau; o berfformio yng Nghanolfan y Mileniwm, Caerdydd i berfformio yn yr Oireachtas, Eisteddfod Genedlaethol yr Iwerddon. Ac mae'n ymddangos bod mwy ar y gorwel.

Dechreuodd ein siwrnai ym mis Chwefror eleni pan dderbyniwyd gwahoddiad gan y dyn ei hun - Max Boyce, i ymddangos fel rhan o'i daith 'Max Boyce and Special Guests' i berfformio yng Nghanolfan y Mileniwm. Estynnwyd y gwahoddiad yn dilyn cyngerdd yng nghlwb rygbi pentref genedigol Max, Glynnedd, lle perfformiodd y côr gyda'r côr meibion lleol. Gwefreiddiol ydy'r unig ansoddair addas i ddisgrifio'r profiad o ganu ar lwyfan mor adnabyddus, yng nghwmni Max Boyce ac i gynulleidfa o 1900 o bobol. Mae'n debyg ein bod wedi gwneud cryn argraff ar Max Boyce hefyd wrth iddo ein cydnabod fel "y côr ieuenctid gorau fi 'di clywed mewn amser hir iawn!"

O Gaerdydd, i Letternkenny, Iwerddon nesaf lle bu'r Côr yn cystadlu yn yr Ŵyl Ban Geltaidd a'r Oireachtas na Gaeilge. Bu'r wythnos yn un llawn hwyl, gyda llawer o gymdeithasu gyda'r cenhedloedd Celtaidd eraill a hyd yn oed mwy o berfformio, ar deledu Gwyddelig, mewn amryw dafarn ac wrth gwrs 'Noson Gymraeg' yr ŵyl.

Cipiwyd ambell wobr hefyd yn ystod yr wythnos, gyda'r arweinydd Gregory Roberts yn ennill yr Unawd Alaw Werin a churo ymhlith eraill, enillwyr Mod Brenhinol Cenedlaethol yr Alban; ac ensemble lleisiol Ger-y-Lli yn derbyn yr ail wobr gan guro'r Moniars. Cipiwyd hefyd y wobr gyntaf yng nghystadleuaeth y Côr Merched a'r ail wobr yng nghystadlaethau'r Côr Cymysg a Chôr Meibion. Yr Uchafbwynt fodd bynnag oedd derbyn dwy wobr gyntaf yng nghystadlaethau Côr Sanctaidd a Chôr Cymysg yr Oireachtas gan guro rhai o oreuon Iwerddon, y Côr cyntaf o Gymru i gyflawni'r gamp.

Wedi dychwelyd i Gymru gyda phum cwpan, unwaith eto ni ddaeth gorffwys. Bu canran o Gôr Ger-y-Lli yn cystadlu yn Eisteddfod James Pantyfedwen, Pontrhydfendigaid lle cipiwyd y Wobr Gyntaf yn y gystadleuaeth Côr Merched a chyntaf yng nghystadleuaeth Côr SATB.

Ar hyn o bryd mae'r côr wrthi yn paratoi ar gyfer Eisteddfod yr Urdd ac ar gyfer cyngerdd ym mis Gorffennaf, 2007 i godi arian at achos Cymdeithas MS Cymru, cymdeithas mae'r côr wedi bod yn cefnogi trwy'r flwyddyn. Mae yna felly cyfnod prysur arall o'u blaenau!

Gan Catryn Lawrence