Gofal mewn ysbytai

gan Harri Parri

16 Chwefror 2011

Adroddiad brawychus

Oedd, mi roedd yr adroddiad a gyhoeddwyd ddoe am y gofal - wel, y diffyg gofal, wir - i'r henoed yn ysbytai Lloegr yn frawychus.

A dw i'n pwysleisio ysbytai Lloegr. Roedd y papurau trymion bron i gyd yn cario'r stori. Hen wraig yn nechrau'i nawdegau, yn gorwedd yn ei gwely ynghanol ei charthion ei hun ac olion y pryd cynt wedi crachennu amgylch-ogylch ei gwefusau hi, a heb ei lanhau - a hithau'n sychedu.

Roedd yna lasiad o ddŵr wrth ochr y gwely ond bod hwnnw allan o'i chyrraedd hi. Ond fedra hi ddim cydio ynddo fo petai o fewn ei chyrraedd hi.

Pardduo pawb

O ddarllen neu wrando stori fel'na y perygl mawr, wedyn, ydi pardduo pob ysbyty led-led Prydain hefo'r un parddu.

Mi fûm i mewn ysbyty yn Lloegr, bedair blynedd yn ôl ac roedd y gofal yno - gofal dwys am gyfnod - yn ardderchog. Ond pan fo adroddiad cwbl annibynnol - yn ôl y Telegraph - yn deud fod tri o bob pump o oedolion, sy'n marw o fewn y mis wedi derbyn triniaeth lawfeddygol, heb dderbyn y gofal disgwyliedig mae'n rhaid ystyried.

Yna, a defnyddio gair meddygol, fe gaed y diagnosis disgwyliedig: y targedau eto fyth, prinder staff, camhyfforddi neu hyfforddiant annigonol a'r ymdeimlad mai hen bobl ydyn nhw beth bynnag.

Roedd yr adroddiad yn awgrymu fod y drwg yn y caws yn ddyfnach na hynny - yn fater o, be ddeuda i, o ffordd israddol o feddwl am gleifion oedrannus ac, o ganlyniad, yn arwain at ffyrdd esgeulus o weithredu.

Gofal, trugaredd, parch

Be oedd ar goll, yn ôl yr adroddiad, oedd 'gofal', 'trugaredd' a 'pharch' - tri gair Beiblaidd.

Ydi hyn yn or-ddweud? Wrth inni gefnu mor llwyr ar yr ysbrydol a llowcio'r materol, yr arwynebol a'r poblogaidd, oes yna berygl i werthoedd fel 'na fynd ar goll?

Dwi'n weddol sicr mai argyfwng cred ydi hi ac, o ganlyniad, newid mewn gwerthoedd.

Ond fel deudodd y Mandy Rice Davies honno, yn nyddiau Profumo, "Mi fydda fo yn deud hynny." Ond deud ei ddeud oedd y gofyn!


Cylchgrawn

Blogiau Crefydd

Blogiau Crefydd

Sylwadau bachog am grefydd, bywyd a'r byd

Dysgu

Dysgu

Codi Cwestiwn

Dysgu am grefyddau'r byd. Gweithgarwch addysg grefyddol rhyngweithiol

Radio Cymru

Bwrw Golwg

Bwrw Golwg

John Roberts yn trafod materion crefyddol bob bore Sul

Hanes

Croes Geltaidd

Crefydd y Cymry

Sut aeth Cymru o fod yn wlad y Derwyddon i wlad y Diwygiad?

Cylchgrawn

Trin a thrafod Llyfrau

Trin a thrafod Llyfrau

Archif o holiaduron awduron, straeon ac adolygiadau llyfrau.

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.