Connected Features

An Nowodhow, 12 Gortheren 2009

Gorthuher da, ha dynnargh meur dhe hwi dhe dhyllans a’n seythen ma ‘An Nowodhow’.

Nebes ahanowgh re glewas seulabrys heb dout a’n towl “Sportva rag Kernow”, martesen an pyth re beu leverys obma war Radyo Kernow, mes mar ny wodhowgh hwi travyth - po skantlowr travyth - a-dro dhodho, ottomma an pyth ywa poran.

Del wodhowgh hwi yn ta heb dout, Kernow yw an unn radn a-ji dhe’n Revaneth Unsys, na’s teves sportva a ehen vyth, ha hemm yw studh bos res dhyn ni takla.

Kernow re brovias - hag a bes dhe brovia - sportyoryon ha sportyoresow neb re gollenwis hag uji ow kollenwel radnow meur war an wariva kesgwlasek yn aray efan a hwarvosow sportek, ha lies anedha bos pur doolys nag uji sportva yn Kernow may hyllons i performya po omgevarwedha, po a’n pyth a yllons i bos prout, hag yma radn vras an poblek neb a gevran an keth omglewans.

Byttegyns, kyn fo an kynsa acheson rag sportva dhe synsi gwryansow sportek, y’n jydh hedhyw sportva yw yn fenowgh komodita liesgweythresek arnowyth, ha na wra yn unnik synsi rugbi, peldroos, boksesi, athletiks h.e. an nivel an uhella, mes yw kresen rag gonisogeth, tornyaseth ha komoditys keskusulya.

Neppyth kepar ha hemma ny vew yn Kernow, hag yw neppyth yn brysyow a veur a dus y koodh dhyn ni kavos.

Bagas ytho re beu furvys, gans an towl dhe dhri sportva wiw an par ma dhe Gernow. Yth yw gwaytys y hwrussa an sportva skoodhya, sport an nivel uhella, akademi sportys rag Kernow, komoditys kevarwedha dien, synsys y’ga mysk dafar ha gweythoryon arbednek rag athletys anablys, kresen dhyski hag adhyskans leundevys ha komoditys erel rag usadow an gemynieth. Ynwedh y fia tyller ilow, yn unn synsi keskanow ayr-efan a bub ehen, ha kavos komoditys keskusulya leun, warbarth gans bostiow hag ostyans.

Y fia kresen fysiotherapi an uhella degre - neppyth a wrussa esya gwask war’n klavjiow Kernewek dre witha aray efan a bystigow sportek.

An sportva ma a via kevarhewians hirdermyn rag Kernow, hag a’n aray a gomoditys a alja  hi profya, ny wrussa hi lenwel gwagva veur yn ynterframweyth a Gernow hebken, mes ynwedh provia komodita rag Kernow dhien - drefen bos hedna an pyth a via, rag Kernow dhien - neppyth may fia Kernow prout yn ewn, ha may hwrussa kreatya rent meur. Hemma oll yn y dro a wrussa provia oberennow meur aga edhom rag Kernow.

Mes a nyns yw hemma neb hunros-piben’? Nyns yw, herwydh an re na re furvyas an bagas dhe vatalya rag an sportva. I re gowlwrug studhyans yn unn wul hevelepter ynter Kernow ha’n konteth Carmarthenshire yn Kembra. Kernow a’s teves poblans a voy es hanter milvil - hag owth enkressya, Carmarthenshire a’s teves a poblans a le es 180,000 mil. Yn Kernow yma trevesigethow kepar ha Pennsans, Kambronn, Redruth, Truru, Tewyn Pleustri, Sen Ostel hag Aberfal gans poblansow a voy es 20,000 dhe bub huni. Yn Carmarthenshire yma unn drevesigeth gans poblans a voy es 20,000 - Llanelli, gans poblans a damm moy es 46,000. Yn-mes a Llanelli nyns eus marnas unn drevesigeth gans poblans a voy es 10,000 - Carmarthen, gans le es 14,000.

Yn Kernow nyns eus sportva vyth, yn Carmarthenshire yma onan da - hodna dhe’n Klug Rugbi Llanelli Scarlets. Yth yw sportva a 15,000 esedh hag a’s teves puptra a vydn an bagas sportva kavos, an pyth re wrug vy notya kyns.

Ytho, rag dalleth hemm yw an dadhel usi ow bos devnydhys.  Yma Carmarthenshire gans poblans a le es 180,000 gans sportva dha, ha Kernow gans teyrgweyth an poblans heb sportva vyth.

Mar mynnir dyski moy a-dro dhe’n bagas sportva ha’ga ober, y hyllir y gavos war an wiasva www.StadiumForCornwall.com

Ha gans hedna, ha tereba nessa Dy’Sul, ‘th yw, dhortiv vy, Rod Lyon, ‘Nos Da!’