BBC navigation

ကရင်အမျိုးသားအစည်းအရုံး အတွင်း သဘောထားကွဲ

နောက်ဆုံး ရေးသားချိန် 28 စက်တင်ဘာလ 2012 - 17:22 GMT

စက်တင်ဘာလဆန်းက KNU နဲ့ အစိုးရ အကြား တတိယအကြိမ် ဆွေးနွေးမှုတွေ ပြုလုပ်ခဲ့

KNU အဖွဲ့ရဲ့ လက်နက်ကိုင် တပ်ဖွဲ့ဖြစ်တဲ့ KNLA စစ်ဦးစီးချုပ် ဗိုလ်ချုပ်ကြီး မူတူးစေးဖိုး ဦးဆောင်တဲ့ အဖွဲ့ဟာ ဘားအံမြို့မှာ ဗဟို ဆက်ဆံရေး ရုံးဖွင့်ဖို့ ထွက်ခွာ သွားတာဟာ KNU ဗဟိုရဲ့ ဆုံးဖြတ်ချက် မပါဘဲ သွားရောက် တာ ဖြစ်တယ်ဆိုတဲ့ ကြေညာချက်ထွက် ပေါ်လာပါတယ်။

KNU ဗဟိုအလုပ်အမှုဆောင် ကော်မတီဝင် ၁၁ ဦး ရှိတဲ့ အထဲက ဗိုလ်ချုပ်ကြီး မူတူးစေးဖိုး၊ ပဒိုဒေးဗစ်ထောနဲ့ ပဒိုရောဂျာ တို့ သုံးဦးဟာ သူတို့ သဘောနဲ့ သူတို့ လုပ်ဆောင်သွားတာ ဖြစ်တယ်လို့ KNU တွဲဖက် အထွေထွေ အတွင်းရေးမှူး (၁) ဗိုလ်မှူးစောလှငွေ က ဘီဘီစီကို ပြောပါတယ်။

ဒါဟာ စုပေါင်း ခေါင်းဆောင်မှုနဲ့ ဗဟိုက ချမှတ်ထားတဲ့ အစည်းအဝေး ဆုံးဖြတ်ချက် တွေကို အလေးမထားပဲ လုပ်ဆောင်တာ ဖြစ်လို့ အရေးယူဖို့ ကိစ္စကိုတော့ စဉ်းစား ဆွေးနွေးဆဲ ဖြစ်တယ်လို့ ဗိုလ်မှူးစောလှငွေက ပြောပါတယ်။

KNU အဖွဲ့အစည်းမှာ ၄ နှစ် တကြိမ်ပြုလုပ်တဲ့ ကွန်ဂရက်က အမြင့်ဆုံး အာဏာပိုင် ဖြစ်ပြီး၊ အဲဒီ ကွန်ဂရက် ရွေးချယ် တင်မြောက် လိုက်တဲ့ ဗဟို ကော်မတီဝင် ၄၅ ဦးဟာ နိုင်ငံရေး စစ်ရေး အတွက် အမြင့်ဆုံး အာဏာပိုင်အဖွဲ့ ဖြစ်တယ်လို့ သူကပြောပါတယ်။

ဗဟိုကော်မတီ အစည်းအဝေးကို တနှစ်တကြိမ် ပုံမှန် ပြုလုပ်ပြီး ဗဟို ကော်မတီ ဝင်တွေ မအားလပ်တဲ့ အချိန်မှာ ၁၁ ဦး ပါဝင်တဲ့ ဗဟို အလုပ် အမှုဆောင် ကော်မတီ EC ကို တာဝန် လွှဲထားတာ ဖြစ်တယ်လို့ ဆိုပါတယ်။

ဒီသတင်းနဲ့ ပတ်သက်သမျှ

BBC © 2014 ပြင်ပ အင်တာနက်ဆိုက်များတွင် ပါဝင်သော အကြောင်းအရာ များကို ဘီဘီစီကတာဝန် မယူပါ

ဤစာမျက်နှာကို CSS ဖွင့်ထားသော နောက်ဆုံးပေါ် internet browserနဲ့ အကောင်းဆုံး ကြည့်နိုင်ပါတယ်။ အကောင်းဆုံး ကြည့်နိုင်ဖို့ ကိုယ့် browser ကို အဆင့်မြှင့်နိုင်ရင်မြှင့်ပါ၊ CSS ကိုဖွင့်ထားရင်လည်း အဆင်ပြေနိုင်ပါတယ်။