Help / Cymorth
« Blaenorol | Hafan | Nesaf »

Mam fach...

Vaughan Roderick | 12:31, Dydd Mawrth, 13 Hydref 2009

menai300245.jpgMae 'na gonswensws ymhlith y pleidiau bod gan Gymru ormod o gynghorau lleol. Mae 'na gonsensws hefyd na ddylid gwneud unrhyw beth ynghylch y peth, neu mi oedd yna.

Ar hyd y blynyddoedd mae'r llywodraeth (a'r gwrthbleidiau) wedi annog cynghorau ac awdurdodau eraill i gydweithio a'i gilydd gan gyfuno adrannau a gwasanaethau. Os oedd hynny'n digwydd ni fyddai angen newid nifer y cynghorau na'u ffiniau. Heddiw aeth y Gweinidog Llywodraeth Leol gam yn bellach.

Yn ôl Brian Gibbons mae'n bryd i'r cynghorau sylweddoli bod dyddiau "busnes fel arfer" ar ben. Fe fyddai'r llywodraeth meddai yn "ymateb yn ffafriol" i gynlluniau i uno cynghorau a byrddau iechyd, fel sy'n digwydd ym Mhowys ar hyn o bryd, neu i uno cynghorau cyfagos. Dyw e ddim yn gam mawr iawn o "ymateb yn ffafriol" i gymell neu orfodi.

Mae'n bosib mai sefyllfa Ynys Môn sydd wedi newid y meddylfryd. Gwella effeithlonrwydd a safon gwasanaethau yn pwrpas cydweithio a chyfuno adrannau. Ond nid safon nac effeithlonrwydd y gwasanaethau yw problem Cyngor Môn. Problem yr ynys yw ymddygiad rhai o'i chynghorwyr.

Yn y cyd-destun hwnnw mae'n bosib gweld sylwadau Dr Gibons fel rhyw fath o gerdyn melyn i gynghorwyr yr ynys. Wedi'r cyfan mae 'na ambell i wleidydd yn y Bae o'r farn mai chwaer fach Gwynedd yw mam Cymru mewn gwirionedd.

SylwadauAnfon sylw

  • 1. Am 13:42 ar 13 Hydref 2009, ysgrifennodd D. Enw:

    Mae'n werth edrych ar y pwnc yma eto. Er 'mod i'n deall pam na fyddai gwleidyddion am dynnu nyth cacwn i'w pen, mae'r sefyllfa economaidd yn rhoi rheswm da i edrych am arbedion.

    Os fydd ail-edrych ar nifer y siroedd gai gynnig dau awgrym:

    Cael gwared ar y cynghorau cymuned sy'n rhy fach a dibwer i wneud unrhyw wahaniaeth ac yn eu lle cael cynghorau ychydig yn fwy http://cy.wikipedia.org/wiki/Cantrefi_a_Chymydau_Cymru . Yn sicr yn y mannau gwledig byddai dilyn ffiniau nifer o'r cymydau yn ffitio'n berffaith. Mae'n nhw'n aml yn cyd-fynd â thalgylchoedd ysgolion uwchradd a theithio i waith e.e. Eifionnydd, Ardudwy.

    Yn uwch na'r cymydau gellid cael siroedd mwy. Nôl âr 'hen' Wynedd. Ond tro yma gall y Gymraeg fod yn ystyriaeth wrth ail-lunio ffiniau. Byddai hyn yn golygu fod Llanrwst yn dod yn nôl rhan o Wynedd er enghraifft. Wedi'r cyfan os fydd y gweision sifil a'r gwleidyddion yn ystyried pethau eraill yna mae cynllunio ar sail iaith hefyd yn feincnod bwysig.

  • 2. Am 15:05 ar 13 Hydref 2009, ysgrifennodd Dewi:

    Y camgymeriad oedd yr ail-drefnu adeg y Normaniaid / Tuduriad - roedd yr hen gantrefi yn gweithio'n berffaith...

  • 3. Am 20:08 ar 13 Hydref 2009, ysgrifennodd monwynsyn:

    Mae cymhell cynghorwyr i gydweithio fel cymhell gwylanod i rannu.

    Pwy sydd am bleidleisio i ollwng gafael a grym a'i symud ymhellach i ffwrdd ? Pawb a'i fys lle bo'i ddolur yw hi. Mae'r ffiniau presennol yn rhy fach a dwi yn amau fod safon a statws y cynghorwyr sirol o dan yr hen drefn yn well gan nad oeddynt wedi ei clymu i ardal fach. Mae'n anodd dadalu yn erbyn democratiaeth ond os rhywbeth mae'r giwed bresennol yn rhy blwyfol ac yn aml yn methu cael perspectif ar ddarlun ehangach.

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.