Nid pob arwr sydd angen asyn

Vaughan Roderick | 11:36, Dydd Llun, 14 Medi 2009

Mae gen i gyfaddefiad. O bryd i gilydd rwy'n teimlo'n rhwystredig nad ydwyf yn gallu dod o hyd i ryw ddyfyniad neu ddywediad bachog i gyfleu syniad neu i ddefnyddio fel pennawd. Ar adegau felly rwy'n estyn i fy nychymyg ac yn bathu rhywbeth sy'n swnio'n dda, yn hynafol ac sy'n cyfleu'r ystyr.

Ffug-ddywediadau a dyfyniadau yw'r rhain mewn gwirionedd, pethau fel "mwy o geffyl gwaith na cheffyl gwedd" neu " y gwas bach sy'n cael y geiniog". Yr un gorau i mi gofio oedd "codi caib i agor cocos"- fy fersiwn Gymraeg i o "sledge-hammer to crack a nut".

Dydw i ddim sicr p'un ai hanner cofio'r pethau 'ma ydw i ai eu creu nhw allan o nunlle! Serch hynny mae'n rhoi boddhad enfawr i mi pan welaf rywun arall yn defnyddio un ohonyn nhw misoedd neu flynyddoedd yn ddiweddarach.

Ta beth, ar y daith yn ôl o Landudno fe drafododd Betsan a finnau y syniad o fathu dywediadau gwbl ddiystyr a'u cynnwys yn ein blogs i weld a fyddai unrhyw un yn sylwi! Fyddai hynny ddim yn beth call yn yr hinsawdd bresennol ond dyma rai o'r ffug-ddywediadau y gwnaethom ni eu bathu.

"Nid hawdd yw twyllo gafr benddu"

"Nid ar gaws y mae codi buarth"

"Un wiwer ni wna goelcerth"

"Haul y bore yw hunllef yr hwyr"

Ydych chi'n gallu meddwl am rai gwell ac oni fyddai'n sbort cael cystadleuaeth fathu yn y Babell Len?

Llyfrnodi gyda
del.icio.us |
Digg |
Newsvine |
NowPublic |
Reddit
- Beth yw hwn?

SylwadauAnfon sylw

1. Am 13:24 ar 14 Medi 2009, Dewi ysgrifennodd:

Mae'n anodd cerdded heb goesau.

Cwyno am y sylw hwn

2. Am 14:13 ar 14 Medi 2009, Geraint ysgrifennodd:

'Y ceffyl a recho a dynn ei bwn.'- un a fathwyd gan 'nhad (dros beint) yn y 50au.

Cwyno am y sylw hwn

3. Am 14:43 ar 14 Medi 2009, Mabon ysgrifennodd:

Dyma ddywediad y bathodd Gwynfor:
"Hanfod Celfyddyd - Cynildeb"

Cwyno am y sylw hwn

4. Am 15:32 ar 14 Medi 2009, Penri James ysgrifennodd:

'Dafad yw dafad ond nid buwch yw buwch' - aralleiriad o'r hyn ddywedodd Elin Jones yn ei araith ddydd Gwener diwethaf pan yn son am LCO cig coch.

Cwyno am y sylw hwn

5. Am 16:46 ar 14 Medi 2009, Daniel ysgrifennodd:

Yn falch i weld bod cynhadledd y Blaid weid esgor ar drafodaeth fywiog am ddyfodol y genedl!

Cwyno am y sylw hwn

6. Am 04:01 ar 15 Medi 2009, Alwyn ap Huw ysgrifennodd:

Yn araf bach a phob yn dipyn mae tynnu'r gwir o reportas BBibun

Cwyno am y sylw hwn

7. Am 09:27 ar 15 Medi 2009, Aled ysgrifennodd:

O ran bachu ymadroddion, beth am hyn, sydd ar hyn o bryd yn brif-bennawd newyddion BBC Cymru'r Byd, a hefyd i'w weld ar y tudalen Saesneg, yn un o'r dolenni:

Iechyd: Canmol i wasanaeth ffôn

'Dyw ef ddim, wrth gwrs, yn golygu dim yn Gymraeg, ond mae'n gyfieithiad gair-am-air o "Health: praise for telephone service" ond bod y sawl a ysgrifennodd y peth wedi edrych am y *ferf* 'praise' yn lle'r *enw* yng ngeiriadur y BBC (neu efallai wedi bod yn "google'o" gan ddefnyddio'r gwasanaeth cyfieithu-i'r-Gymraeg newydd, sydd ar y cyfan yn arbennig o dda er bod angen bod yn wyliadwrus).

Mae gweddill yr erthygl hefyd yn frith o ysgrifennu (neu gyfieithu) gwael.

Google'o gwael yw gwarth y gair.

Cwyno am y sylw hwn

8. Am 16:07 ar 15 Medi 2009, Vaughan Roderick ysgrifennodd:

Wedi ei gywiro. Diolch.

Cwyno am y sylw hwn

9. Am 21:26 ar 15 Medi 2009, Siân ysgrifennodd:

'Swn i'n anghytuno ag Aled. Mae "canmol" yn enw sy'n golygu "mawl, moliant, clod, ffafr, cymeradwyaeth" yn ôl Geiriadur Prifysgol Cymru. "Mae canmol mawr i'r prifathro newydd" "Roedd tipyn o ganmol ar y bregeth dydd Sul". (dw i ddim yn hollol siwr ydi "canmol i" yn iawn - ond mae "canmol ar" yn sicr yn iawn.)

Cyn cywiro, tsheced!

Cwyno am y sylw hwn