Pumed colofn?
Dyma stori fach ddiddorol. Yn gynharach yr wythnos hon cyhoeddodd cwmni ComRes ganlyniad arolwg barn a gynhaliwyd ymhlith aelodau cynulliad. Holodd ComRes union hanner yr aelodau- trideg aelod i gyd. Dyw'r arolwg ddim wedi cael rhyw lawer o sylw gan fod newyddiadurwyr yn amheus ynglŷn â maint y sampl. Serch hynny mae 'na un casgliad sy'n hynod ddiddorol sef hwn.
Mae mwyafrif o aelodau Plaid Cymru yn ffafrio annibyniaeth lwyr i Gymru ac mae 'na leiafrif o Aelodau Cynulliad Llafur yn rhannu'r un safbwynt.
Dyw e hi ddim yn syndod, efallai, nad yw holl aelodau Plaid Cymru yn ffafrio annibyniaeth. Mae'r gair ei hun yn rhwystr i rai tra bod eraill yn credu mewn ymladd un frwydr ar y tro. Ond Aelodau Cynulliad Llafur yn cefnogi annibyniaeth? Mae hynny yn dipyn o ryfeddod.
Yn fy holl amser fel newyddiadurwr gwleidyddol dydw i erioed wedi clywed Aelod Cynulliad nac Aelod Seneddol Llafur yn dweud ei fod o blaid annibyniaeth i Gymru hyd yn oed mewn sgyrsiau preifat.
Ond yn ôl ComRes (a does 'na ddim rheswm i amau cwmni mor flaenllaw) dyna yw barn rhai ohonyn nhw. Efallai mai dim ond mewn fforwm diogel a dienw fel pôl piniwn y maen nhw'n fodlon cyfaddef hynny.
Dau gwestiwn. Pwy ydyn nhw? A phwy sy'n mynd i ddweud wrth Don Touhig?
DIWEDDARIAD;Dw i wedi bod yn siarad â ComRes i gael rhagor o fanylion. Yr union gwestiwn a ofynnwyd oedd "Should Wales be totally independent of legislation enacted by Westminster?" Mae ComRes yn diffinio hynny fel "being in favour of total independence". I fi mae 'na elfen amwys. Hynny yw, mae'n bosib bod yr aelodau yn golygu eu bod yn dymuno gweld Cymru'n deddfu yn annibynnol o fewn y meysydd datganoledig. Holwyd deuddeg aelod Llafur. Roedd ymateb dau ohonyn nhw yn gadarnhaol.
Golygydd Materion Cymreig y BBC yn blogio'n rheolaidd ar faterion gwleidyddol Cymru.
© MMIX~RS~q~RS~~RS~z~RS~44~RS~)
SylwadauAnfon sylw
Heb wybod y ffigyrau i gyd, a'r canradd o'r ddau yn y glymblaid, mae'n galed i mi weld os byddai mwyafrif o'r 'llywodraeth' [?] Llafur/Plaid Cymru o blaid annibyniaeth - 'moot point' ?...
Ond heb fod y pobl yn pleidleisio am annibyniaeth [neu cam neu ddau lawr yr heol ni ] mae hwn braidd yn academig ?
Cwyno am y sylw hwn
Er bod hynny YN syndod, mae 'nhad i'n Llafurwr ond mae'n credu y dylai Cymru fod yn wlad annibynnol. Efallai bod yr aelodau Llafur (prin dwi'n cymryd!) hynny o'r un fath o feddwl, sef y DYLAI Cymru fod yn wladwriaeth, ond yn eu barn nhw nid yw'n syniad realistig/ymarferol?
Cwyno am y sylw hwn
Pam ar wyneb y ddaear wnaeth ComRes gofyn y cwestiwn mewn ffordd a all gael ei gam-ddehnogli. Mae digon o gwestiynnau cyfansoddiadol safonol a byddai'n ddifyr iawn clywed barn yr aelodau Llafur ac eraill bryd hynny. Cofier fod un arolwg (safonol) o aelodau'r cynulliad cyntaf wedi dangos fod un Ceidwadwr o blaid annibyniaeth!
Cwyno am y sylw hwn