Help / Cymorth
« Blaenorol | Hafan | Nesaf »

Elin, o Elin...

Vaughan Roderick | 12:38, Dydd Mawrth, 13 Gorffennaf 2010

_1109309_badger_bbc_150.jpg"Gwnes i bron bwrw mochyn daear ar y lôn y noson o'r blaen ond roedd y diawl yn symud yn rhy gyflym i fi!" Fe wna i ddim enwi'r aelod o'r gwrthbleidiau wnaeth ddweud hynny ond mae barn/rhagfarn gwleidyddion y gwrthbleidiau ynghylch moch daear efallai'n esbonio'u hamharodrwydd i geisio manteisio'n wleidyddol yn sgil dyfarniad yr Uchel Lys heddiw.

Yn sicr fe fyddai modd i'r gwrthbleidiau alw am ymddiswyddiad gweinidogol ar gynsail Crichel Down sy'n awgrymu bod yn rhaid i weinidog dderbyn y cyfrifoldeb am fethiannau ei adran. Does dim arwydd bod y Ceidwadwyr na'r Democratiaid Rhyddfrydol yn bwriadu gwneud hynny ond os oedden nhw mae cwestiwn arall yn codi sef hwn. Pa weinidog ddylai dderbyn y cyfrifoldeb - Elin Jones sy'n bennaeth yr adran berthnasol neu John Griffiths y Cwnsler Cyffredinol?

Nid pwynt bach yw hynny. Pan ffurfiwyd y glymblaid bresennol fe drodd Rhodri Morgan swydd y Cwnsler yn un gwleidyddol fel ffordd o gynyddu'r nifer o weinidogion yn ei gabinet.

Mae'r sefyllfa o'r fath yn codi cwestiynau ynghylch safon y cyngor cyfreithiol y mae'r llywodraeth yn ei dderbyn a hefyd yn cymylu atebolrwydd Gweinidogion am gamgymeriadau cyfreithiol.

Efallai nad yw'r gwrthbleidiau am alw am ben Elin Jones sy'n cael ei gweld fel gweinidog poblogaidd ac effeithiol. Ar y llaw arall onid yw hi'n bryd cwestiynu'r arfer o ddefnyddio penodiad prif swyddog cyfreithiol y llywodraeth fel modd i ddyrchafu a gwobrwyo gwleidydd.

SylwadauAnfon sylw

  • 1. Am 17:08 ar 13 Gorffennaf 2010, ysgrifennodd Huw Jones:

    Mae Elusun o Loegr yn mynd i Llys yn Lloegr i stopio polisi Llywodraeth Cymru - Sut mae hwn gallu fod yn iawn?

  • 2. Am 20:39 ar 13 Gorffennaf 2010, ysgrifennodd AVBK:

    Hapus i weld y mochyn daear yn cael ei arbed ac enw da Cymru hefyd - dim ots beth chi'n gwneud gydag Elin Jones - cwrs gwyddoniaeth sylfaenol ro'n i'n awgrymu.

  • 3. Am 10:51 ar 14 Gorffennaf 2010, ysgrifennodd Ceri Williams:

    Bendigedig Vaughan
    Mae polisi Plaid Cymru yn cael ei weithredu gan gweinidog Plaid Cymru, ond bai Llafur yw hi nad yw'r polisi yn un gyfreithlon.

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.