« Blaenorol | Hafan | Nesaf »

Rhun o'r Maes - dydd Mawrth

Categorïau:

Rhun ap Iorwerth Rhun ap Iorwerth | 12:52, Dydd Mawrth, 2 Awst 2011

Mae rhywbeth newydd ym mhob eisteddfod. Eleni, nod rhaglen 'Cefnlen' yn y Babell Len ydi annog pobl i ysgrifennu a barddoni.

 

Ond bues i’n ddigon ffodus, yn fyw ar S4C neithiwr, i gael ‘masterclass’ cynganeddu gan ddau Brifardd, Mererid Hopwood a Dylan Iorwerth.

 

Roeddem wedi gosod her iddyn nhw, ynghyd a’n dyddiadurwr fideo gwadd, Myrddin ap Dafydd i ‘sgwennu englyn yr un erbyn ddiwedd y dydd. Ond bu’n rhaid i’r cyflwynydd druan (ac alla’ i ddim englyna’, wir!) roi cynnig arni.

 

Dyma, felly, ganlyniad ein hymdrechion. Myrddin ap Dafydd yn gyntaf, yn cyfansoddi englyn am yr eisteddfod drwy lygad plentyn:

 

Cariaist o’r maes sticeri a beiros,

 beiros sbar, taflenni.

Mae hen drysor, hen stori

 yn y stomp ar dy grys di. 

  

Mererid Hopwood oedd nesaf, gydag englyn am bwysigrwydd mynd i’r eisteddfod yn hytrach na dim ond ei gwylio ar y teledu:

 

I Wrecsam trowch eich camau -  a rhedwch

i’r adwy. Dewch, ffrinidau –

 y Gymraeg ddi-gamerau

yn siwr sy’n blasu orau.

  

Ac yn olaf, Dylan Iorwerth, ar yr etifeddiaeth o un genhedlaeth i’r llall drwy’r eisteddfod diwylliant Cymreig: 

 

Rhoddi dawn a rhoi cerdd dant - rhannu gair

yn goeth, rhoi diwylliant.

Rhoi o’n plith y wefr i’n plant -

dolenni ein diwylliant.

 

A finnau? Wel wedi llawer iawn o newid a gwelliannau gan Mererid a Dylan ar y soffa yn ystod y rhaglen, dyma englyn longyfarch gan y tri ohonom ni i Geraint Lloyd Owen, Goronwyd b’nawn ddoe.

 

 geiriau cest ti goron y seiri.

Wyt seren y noson!

A weli, yn dy galon,

fawl a chlod y sdeddfod hon?

 

Diolch i Myrddin, Mererid a Dylan. Mae’n amser mynd am dro eto o gwmpas y maes....

 

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.