Help / Cymorth
« Blaenorol | Hafan | Nesaf »

Serbia v Cymru

Glyn Griffiths | 14:57, Dydd Iau, 13 Medi 2012

Pan ddaeth yr enwau allan o'r het ar gyfer grwpiau rhagbrofol Cwpan y Byd 2014, roeddwn yn teimlo'n gwbl hyderus am obeithion Cymru.

Yn wir, dyma ddyfyniad allan o golofn a sgwennais ar ôl deall pwy fyddai ein gwrthwynebwyr yng Ngrŵp A:

Mae gweld Cymru yn yr un grŵp a Croatia, Gwlad Belg, Macedonia, yr Alban a Serbia wedi codi gobaith newydd. Alla'i ddim cofio unrhyw beth mae Gwlad Belg wedi ei gyflawni yn ddiweddar fyddai yn ein dychryn, ac er nad yw Cymru wedi curo Croatia mewn tair gem, anwadal ydi safon eu peldroed. Tydi Macedonia ddim yn dim i ni golli cwsg drostyn nhw, tra fod Serbia yn dibynnu yn ormodol ar garfan fechan o chwaraewyr megis amddiffynnwr Manchester United Nemanja Vidic. Does ond i Gymru efelychu eu perfformiad yn erbyn yr Alban ar faes Caerdydd yn 2009 i sicrhau na fyddai ein cefndryd Celtaidd chwaith yn profi'n faen tramgwydd ansymudol. Petaech wedi gofyn i unrhyw wlad pa dim oeddynt am ei osgoi o'r pot chwech isaf, gallwch fod yn sicr mai Cymru fyddai pob un wedi ei enwi.

Croeso i gemau rhagbrofol Cwpan y Byd; byddai dechrau da yn hanfodol, ac edrychwn ymlaen yn awr i weld os caiff y gemau eu trefnu mewn dull a fyddai yn sicrhau'r cychwyn gorau i Gymru.
Wel wir - welsoch chi'r fath falu awyr erioed - ond o leiaf dwi'n barod i dderbyn fy ngham, ac mae'n eithaf amlwg heddiw fod yn rhaid i'r chwaraewyr a phawb arall sydd yn ymwneud a'r tîm cenedlaethol dderbyn fod gwaith called i'w wneud os am achub unrhyw beth yn erbyn yr Alban ar Hydref 12.

Digon hawdd pwyntio bys, digon hawdd dweud fod yna ormod o chwaraewyr allweddol ddim ar gael, ond ni ddylai James Collins gysgu'n hawdd ar ôl ei dacl ffol yn erbyn Gwlad Belg. Dwi ddim wedi fy argyhoeddi chwaith fod gan Gymru arweiniad cadarn ar hyn o bryd ac fe fyddai'n well gen i weld Aaron Ramsey yn cael llonydd i gydgordio canol cae na cheisio arwain yr holl dîm. Oni fyddai Ashley Williams yn well fel arweinydd a chapten?

Yn y gôl dydw'i ddim wedi fy argyhoeddi gan Boaz Myhill chwaith er mai Glyn ydi ei enw iawn o (ond ar ôl nos Fawrth fe gaiff ei alw yn Boaz am y tro)!! Dwi wedi gweld Owain Fôn Williams yn chwarae dwywaith y tymor yma yn barod - yn dangos cysondeb, yn ddewr ac yn awdurdodol ei ddull. Y tu ôl i amddiffyn Tranmere Rovers, sydd ond wedi ildio dwy gol ac sy'n eistedd yn ail safl'r Adran Gyntaf, mae Owain yn chwarae yn rheolaidd ac yn dangos cysondeb parhaol yn ei gem ei hun, fel aelod o dim sydd ar hyn o bryd yn llawn hyder.

Dydw'i ddim yn rhannu barn rhai o'r cefnogwyr, sydd ar wefannau cymdeithasol, yn brysur feirniadu Chris Coleman. Camgymeriadau a diffyg canolbwyntio unigol oedd yn fwyaf amlwg yn y ddwy gêm yn erbyn Gwlad Belg a Serbia, ond fe fydd rhaid i'r rheolwr a'i dim sicrhau y bydd y garfan gyfan yn dod i Gaerdydd ar Hydref y deuddegfed yn llawn hyder a gobaith am ail afael a'u gobeithion.

Ceir cysur wrth inni ddeall y bydd gwledydd Croatia, Macedonia, a Serbia yn siŵr o gymryd pwyntiau oddi ar ei gilydd, ac os allwn ddefnyddio esiampl, neu ddysgu gwers o hanes, yna ar ôl colli o 5 - 1 yn erbyn Romania yn 1992, newidiwyd ffurf y tîm gan Terry Yorath, a chafwyd rhediad o ganlyniadau ffafriol.

Yr hyn fydd angen i Coleman ei wneud ydi ystyried sut i wella'r tîm yn sylweddol, fel ag y gwnaeth Yorath, ac i hyn ddigwydd, bydd angen inni gyd ei gefnogi i'r eithaf.

Os gall hyn ddigwydd, ac yn cychwyn yn erbyn yr Alban, yna pwy a ŵyr, - hwyrach daw haul ar fryn unwaith eto. A does ond gobeithio y bydd Craig Bellamy yn parhau gyda ni!

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.