Help / Cymorth
« Blaenorol | Hafan | Nesaf »

Dyfodol y Seintiau

Glyn Griffiths | 14:28, Dydd Iau, 5 Mai 2011

Ymddengys fod perchennog y Seintiau Newydd, Mike Harris, yn anhapus gyda pherfformiad ei dim a hefyd gyda rheolaeth y tîm, yn dilyn perfformiad y Seintiau yng ngêm allweddol Uwchgynghrair Cymru, oddi cartref ym Mangor yr wythnos diwethaf.

Gyda'i dim sydd wedi dangos safon uchel o beldroed drwy'r tymor a chyda Mike Davies y rheolwr yn dangos ei fod cystal os nad gwell na'r rhan helaeth o reolwyr yn yr Uwchgynghrair, dwi'n synnu'n fawr at eiriau Mr Harris.

Onid gwell fyddai i Mr Harris ofyn pam nad oes ond ychydig o gefnogwyr yn trafferthu dod i weld y Seintiau yn chwarae?

Os mai dyletswydd y tîm a'r rheolwr ydi perfformio ar y cae, yna cyfrifoldeb pwy ydi annog y gymdogaeth leol i gefnogi'r tîm, a denu mwy na rhyw ddau gant o gefnogwyr i weld y Seintiau yn chwarae?

Beth ar wyneb y ddaear all Mike Davies a thîm Y Seintiau ei wneud i ddenu cefnogaeth eang o ardal Croesoswallt, wn i ddim.

Mae safon eu peldroed wedi bod yn uchel. Cafwyd rhediad da yng nghwpan Ewrop( rhywbeth nad oedd y Seintiau wedi ei gyflawni o'r blaen) a doedd neb yn cwyno pan ddaeth swm o arian enfawr i mewn i'r clwb yn sgil y fuddugoliaeth dros y Bohemiaid o Ddulyn.

Os ydi Mr Harris yn ystyried dyfodol y Seintiau, fel ac y mae wedi ei awgrymu mewn erthygl ar wefan Welsh-Premier.com, yna hwyrach y dylid ystyried faint o barch sydd gan yr ardal i'r tîm!

Dwi eisoes wedi clywed y Seintiau yn cael eu cyfeirio atynt fel y tîm sydd yn cynrychioli sir Amwythig yn un o'r cyfryngau. A finnau'n meddwl mai cynrychioli Cymru yr oeddynt!
Mae Croesoswallt wedi bod yn rhan annatod erioed o ddatblygiad cynnar peldroed Cymru - ond ydi trigolion Croesoswallt yn gweld eu hunain fel rhan o beldroed Cymru erbyn heddiw?

Gyda dim llawer mwy na rhyw ddwy gant o gefnogwyr yn gweld y Seintiau yn chwarae adref, onid gwell fyddai iddynt godi pac, a symud i ardal arall, o fewn Cymru, ble caiff y tîm a'r rheolwr talentog yma eu gwerthfawrogi yn well?

Hwyrach y byddai hyn yn fan cychwyn gwell i Mr Harris ei ystyried na lladd ar ymdrechion tîm sydd wedi rhoi llwyfan teilwng iddo o fewn Cymru, ac o fewn Ewrop yn ehangach.

A hwyrach byddai aros yn Llansantffraid, ble roedd parch mawr i'r tim lleol, wedi bod yn well opsiwn!

Na farno fel na'ch bernir Mr Harris.

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.