Yr oedd dau fwlch ar lwyfan Y Bala yn ystod seremoni'r Cadeirio ddoe.

Y bwlch yn y gadair - a'r bwlch a achoswyd gan absenoldeb yr Archdderwydd, Dic Jones, sydd yn rhy wael i fynychu ei ail Eisteddfod yn Archdderwydd.

Mi soniais i ychydig yn ôl gymaint mae'r Bala yn ei olygu i Dic ac er gwaethaf ei waeledd cyfansoddodd gywydd yn mynegi'r teimladau hynny ac fe'i darllenwyd dan deimlad gan Gofiadur yr Orsedd, y Prifardd John Gwilym Jones.

Hiraeth am y Bala
Y mae unlle ym Mhenllyn
lle'r wyf fi'n myfi fy hun,
yn gweithio cragen pennill
mewn chwys maith bob yn saith sill
wrth ryw gymell a chellwair
â hen gnawes gormes gair.

Ac yn ardal y Bala
ers yn hir mae 'na dir da
i'r brid a fu'n hir barhau
i garu plethu geiriau,
a'r cymeriad brafado
yn cyfri'n frenin y fro.

A dyma fro f'atgofion
o'm cynhaeaf brafiaf, bron -
fy urddo'n fardd yn fy oed
yn angerdd balchder iengoed.

Ond mae cael gormod clodydd
yn gynnar, yn difa'r dydd,
a rhyw wàg o eiriogwr
yw eilun serch Bala'n si^wr.

Ac yn naear yr Aran
lle mae llawer ceinder cân,
lle mae'r ffair yn llamu'r ffyrdd
mae'r Pethe'n bethe bythwyrdd.

Pe cawn, fe awn i heno
i erwau ffraeth yr hoff fro
a'm nef fyddai camu'n ôl
yn enwog - anhaeddiannol.
Dic yr Hendre

Bydd y rhai hynny oedd yno yn cofio mai cywydd gan Dic yr Hendre a ddarllenwyd hefyd oddi ar lwyfan Prifwyl yr Urdd yng Nghaerdydd pan nad oedd cadeirio yno ychwaith rai wythnosau yn ôl.

Ac er na allai dim wneud iawn am y siom o gadair wag ddoe yr oedd gwerthfawrogiad cynulleidfa'r Bala yn gwbl amlwg.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?