Yn yr Alban ddechrau'r wythnos a gweld fod jôc gan ein Rhod Gilbert ni ymhlith deg o rai gorau yr Edinburgh Fringe.

Yn ffodus, mae hi'n cyfieithu'n weddol ddidrafferth i'r Gymraeg - rhywbeth nad yw'n digwydd yn aml iawn gyda jôcs.

Ta beth, dyma ddweodd Rhod: "Gwesty sba? Mae'n union fel pob gwesty arall ond bod yna lun carreg o wely afon yn y dderbynfa."

I arbed trafferth ichi, "pebble" ddywedodd o. Fel yr awgrymais i dim ond ffŵl fyddai'n ymgymryd â chyfieithu jôcs.

Cyn dewis y jôc yna gwrandawodd naw beirniad ar gyfanswm o 3,600 munud o gomedi yn yr ŵyl a hidlo 7,200 o jôcs ar gyfer rhestr fer o 27 y byddai pobl fel chi a fi yn pleidleisio iddyn nhw.

Jôc gan Dan Antopolski ddaeth i'r brig a chan nad ydi hi, yn fy marn i, yn arbennig o dda yn y Saesneg gwreiddiol wnâi ddim gwneud mwy o gam â hi trwy ei chyfieithu er mai ond wyth gair sydd iddi:

"Hedgehogs," meddai, "why can't they just share the hedge?"

Rwy'n siŵr y cytunwch, os mai dyna'r orau rhad ar yr un ddaeth yn 7, 200 ar y rhestr!

Yr un ddaeth yn ail oedd orau gen i o'r deg uchaf, gan Paddy Lennox:

"Yr oeddwn i'n gwylio marathon Llundain," meddai, "a gweld un rhedwr wedi ei wisgo fel iâr a rhedwr arall fel wy. Wel, meddyliais, mi all hyn fod yn ddiddorol."

Roeddwn i'n eithaf hoffi sylw Marcus Brigstocke hefyd:

"I'r rhai hynny ohonoch sy'n berchen iPhone - dim ond wedi'i brynu fo ydy chi nid ei ddyfeisio."

Yn rhyfedd iawn doedd y jôc a dybiwn i yr orau o'r rhai y darllenais ddim hyd yn oed ymhlith y deg uchaf

"Mae 'na lot o bobol yn fy nghyhuddo i o fod yn hunanol - ond dyna ddigon amdanyn nhw . . ."

Ta waeth, un peth ddaeth yn amlwg iawn i mi wrth ddarllen am y dethol a'e didol; dydi Caeredin ddim yn lle y byddech chi'n teithio o bell iddo i glywed jôcs.

Clywais well yn ein steddfod fach ni.
Chwithau hefyd, siŵr o fod - ac os ydych chi am rannu - wel anfonwch, nawr.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?