Blog C2 - BBC Cymru

Penwytnos Boncyrs!

Huw Stephens — Thu, 16 Jul 2009 17:53:57 +0000

Roedd gwyl T In The Park yn un do'n i erioed wedi bod iiddi, a roedd popeth ro'n i wedi clywed amdani yn wir. Mae'r gynulleidfa Albanaidd yn gwybod sut i fwynhau eu hunain! Roedd y naws rywbeth tebyg i wyl Reading a Leeds a dipyn bach hefyd i'r Sioe Amaethyddol! Y math yne o vibe. Lot o fandie da yne, a llwyth o fandiau Albanaidd yn chware gigs i gynulleidfaoedd enfawr. Mae'n hawdd anghofio faint o artistiaid mawr sy'n dod o'r Alban; Franz Ferdinand, Snow Patrol, Calvin Harris, Edwyn Collins, Broken Records, Phantom Band, Young Fathers. Roedden nhw i gyd yne a roedd llawer ohonynt yn wych ar y penwthnos yn ystod yr wyl. Ar ol yfed te yn T, es i lawr i Wakestock yn Abersoch. Roedd y mwd yn eitha gawel ar y dydd Sul, ond dim glaw fel ar gychwyn yr wyl. Weles i set gwych gan Y Promatics o Ddyffryn Nantlle, bach o Cowbois Rhos Botwnnog oedd yn hwyl a Dizze Rascal! Dizze oedd yr uchafbwynt; roedd Bonkers yn.....Boncyrs.

Does na ddim byd ymlaen...

Criw C2 — Wed, 15 Jul 2009 09:55:26 +0000

Fel arfer, tua'r adeg yma mis Gorffennaf, mi fydda ni fel criw yn gorffen y paratoadau at Sesiwn Fawr Dolgellau. Pethau fel ffonio bandiau i gael "set-lists", gwneud running orders melltigedig o gymleth, siarad hefo Ywain Myfyr a'r trefnwyr am unrhyw newidiadau, gwneud nodiadau i'r cyflwynwyr - ac wrth gwrs cadw golwg ar y rhagolygon tywydd. Rhaid i mi gyfadde mod i'n hynod drist nad oes na Sesiwn eleni. Hon ydy'r wyl dwi'n fwynhau fwya - ma pawb mor gyfeillgar, mor groesawgar, ac mae gan y trefnwyr wir gariad at y gerddoriaeth. Gobeithio daw hi yn ol yn 2010.

Yn y cyfamser, mae yna ddisgwyl i rai pobol fynd i Ddolgellau beth bynnag!! Ac os ewch chi, mi fydd 'na gig hefo Cowbois Rhos Botwnnog yn Ty Siamas rhwng 1pm a 5pm, ac wedyn Wyrligigs, Cowbois, Bob a'r Ods yn y Clwb Rygbi o 5pm ymlaen. Enw'r digwyddiad ydy... "Does na ddim byd ymlaen ond ma' pawb yn dwad"!!!! Mi ddylwn i nodi fod Cowbois Rhos Botwnnog wedi chwara am ddim llynedd i geisio helpu'r wyl.

Mi ddyla ni hefyd roi "mensh" sydyn i CD newydd Celt, "Cash Is King". CD byw ydy hwn o'i set nhw yn Sesiwn Fawr y llynedd, ac mi fydd yr holl elw yn mynd i helpu'r Sesiwn Fawr.

Welai chi yno yn 2010, gobeithio.

Dim byd 'ffishi' am fideo'r Threatmantics!

Robin Owain Jones — Tue, 14 Jul 2009 22:03:58 +0000

Helo unwaith eto!

Braf iawn oedd cael sgwrs efo Heddwyn o'r band 'The Threatmantics' ar C2 heno, a chael peth o'i atgofion o am ffilmio'r fideo gwych ar gyfer y gan 'Wedi Marw'.

Gwyliwch fideo y Threatmantics - Wedi Marw

Mi gafodd o'i ffilmio bron i dair mlynedd yn ôl i gyd-fynd a rhyddhau y sengl ddybl-A-ochrog (!) Sali Mali / Wedi Marw, ac werth ei wylio - i weld Heddwyn yn socian wedi i fwceidiau o ddwr gael ei luchio drosto, ac i weld aelodau'r band yn cael eu tarro yn eu wynebau gan bysgod go iawn (hynny yw, dim pysgod ffug)!

Newyddion gwych i holl ffans y Threatmantics allan yna, mae nhw am fod yn cychwyn gweithio ar ei hail-albym tua mis Medi, ac mae cryn dipyn o ganeuon Cymraeg am fod ar yr albym newydd yma.

Band Gwyliwch y Gofod yr wythnos yma yw Wyn Williams - ewch draw i wefan C2 i gael rhagor o fanylion ac i weld y linc i'w dudalen myspace.

Tan yr wythnos nesa,
Rob.

O'r Alban i Abersoch

Huw Stephens — Wed, 08 Jul 2009 10:21:42 +0000

Mae'r haf o wyliau cerddorol yn parhau i fi eleni gyda T in the Park yn yr Alban dros y penwythnos. Heb fod o'r blaen, a fi'n edrych mlaen i weld yr wyl mae pawb yn ei ganmol gymaint. Mae'r gynulleidfa Albanaidd yn enwog am fod ymysg y gorau yn y byd; mae bandiau a DJ's wrth eu boddau yn chware iddynt achos mae nhw'n gwybod sut i gael parti.

Dydd Sul mi fyddai'n DJ'io yng Ngwyl Wakestock yn Abersoch. Mae'n wyl sydd wedi tyfu dipyn ac yn parhau i ddathlu'r chwaraeon o donfyrddio a dod a bandiau enfawr i chwarae yno i gynulleidfa wych. Edrych mlaen i weld Y Promatics, Dizzee Rascal a'r Gallops yn fawr!

Fideo 'Madrach' - swreal a gwych!

Robin Owain Jones — Tue, 07 Jul 2009 21:52:47 +0000

Yr wythnos yma, Hywel Pitts oedd artist 'Gwyliwch y Gofod' - sef cyn-brif leisydd y band ifanc, gwych 'Dirty Words'.

Yn ogystal a hynny, mae'r ail-bit newydd yn parhau - sef y slot ychwanegol lle dwi'n son rhywfaint am fideo gan fand Cymraeg sydd i'w wylio ar y wê.

Fideo swreal ond gwych i'r gân 'Madrach' gan Derwyddon Dr Gonzo gafodd sylw yr wythnos yma, ac mi ges i sgwrs efo Ifan Dafydd o'r band am ei atgofion o ddiwrnod ffilmio'r fideo ar gyfer 'Bandit' nol yn 2007. Dwi wedi chwerthin gymaint wrth wylio'r fideo, lle mae'r actor Huw Marshall yn actio rhan y prif gymeriad - dyn torri gwallt sydd ddim yn gwneud job rhy dda ohoni - a thrio dyfalu pa un o aelodau'r band yw pwy, o dan eu dillad rhyfedd a'u gwalltiau gwirion!

Ewch draw i gael golwg ar y fideo drostoch eich hunain - mae wir werth cymeryd golwg arno: Fideo Derwyddon Dr Gonzo - Madrach

Mi fydda'i nol ar C2 nos Fawrth nesaf, gyda band neu artist 'Gwyliwch y Gofod' arall, ac mi fydd fideo gwych arall yn cael sylw yn yr 'ail bit newydd'. Yn y cyfamser, mwynhewch y fideo i 'Madrach' - a chofiwch fod Derwyddon Dr Gonzo yn rhyddhau eu halbym gyntaf 'Stonk' ar Orffennaf 27ain, ac yn cloi pethau ym Maes B, Eisteddfod y Bala fis nesa.

Dwi methu disgwyl!
Rob.

Enwogion

Huw Stephens — Fri, 03 Jul 2009 13:50:52 +0000

Be chi fod i neud pan chi'n gweld rhywun enwog? Fi'n gofyn achos fi newydd weld Brandon Flowers o'r band hynod o boblogaidd The Killers ar y ffordd i'r un tren a fi. Ydech chi fod edrych i ffwrdd, a trio esgus bod chi ddim wir yn becso fod nhw'n enwog a bod chi'n gweld pobl gyda gwynebau cyfarwydd fel nhw bob dydd?
Neu ydech chi fod syllu am dipyn bach, ond ddim gormod nes bod nhw'n cael eu ffricio allan gan y sefyllfa? Ydi deud rwbeth tebyg i 'Wwww, helo, fi'n ffan o'ch cerddoriaeth/ffilm/rhaglen/be bynnag' yn syniad da, neu ydyn nhw'n clywed hynny drwy'r amser? Siwr mae deud rwbeth clyfar a doniol a doeth ydi'r ateb, rhywbeth fyddan nhw'n cofio am fisoedd i ddod, fydd yn neud nhw chwerthin a meddwl 'roedd y person yne nath sbotio fi wir yn berson da!'.
Fyddwch chi'n falch o wbod, yn yr eiliadau nes i glocio Mr Flowers, nes i ddim on edrych am eiliad neu ddwy a troi i syllu ar y llawr. O'n i ddim ishe ffricio fe allan.

Murray-Mania!

Glyn Wise — Thu, 02 Jul 2009 10:13:09 +0000

Mae rhaid i mi gyfaddef mae Murray-Mania wedi fy nharo. Rydw i wrth fy modd gyda tenis, yn ei wylio fel sach o datws o flaen y teledu am 24 awr. Mae'n hen bryd i Brydeinwr guro Wimbledon, mae yna 73 o flynyddoedd wedi bod ers i Fred Perry ennill, felly come on Andy!
Mae o'n chwarae'n dda, yn gyflym, yn bwerus a llawn sgiliau ar y cwrt. Er mai ef yw'r ail ffefryn i guro'r bencampwriaeth, rwy'n siwr y byddai'n curo Federer yn y ffeinal gyda cefnogaeth y dorf.
Ond, dweud hynny, mae'n rhaid iddo guro Roddick neu Hewitt yn y rownd gyn-derfynol. O safbwynt y merched, rwy'n siwr mai Venus Wiliams sydd am guro. . Gall Serena (ei chwaer) fod yn or-hyderus weithiau, rwyn gobeithio y byddai Venus yn ei rhoid yn ei lle!

Ers bod adref, mi agorais y parc ym Mlaenau Ffestiniog. Cefais dlws o gadair wedi ei wneud o lechen am hybu fy mhentref. Tra oeddwn yno dechreuais y rasus 100m i blant a roeddwn yn beirniadu gystadleuaeth gwisg ffansi. Mae'n waith anodd iawn pan fo mamau y plant i gyd tu ôl i mi. Cefais amser gwych a mae'r parc werth ei weld.

Yfory, fyddai'n mynd i Lundain i chwarae bingo gyda'r Daily Mirror - Peidiwch gofyn! Yna, fyddai ar BBLB gyda George Lamb. Edrych ymlaen yn fawr ac yna mi fyddai'n hedfan i Hng Kong ar fy ngwyliau. Tydi bywyd yn gret!

Michael Jackson

Criw C2 — Wed, 01 Jul 2009 15:04:53 +0000

Doeddwn i ddim yn ffan enfawr o Michael Jackson (er mai Bad oedd yr albym gynta i mi ei brynu erioed), ond byddai'n anodd iawn gwadu ei gyfraniad, felly nos Wener dwytha nes i benderfynnu peidio darlledu'r rhaglen Lisa roedde ni wedi ei recordio yn barod, ac yn hytrach gwneud rhaglen fyw i ddathlu cerddoriaeth Michael Jackson, yn nghwmni 3 cerddor Cymraeg sy'n ffans enfawr - Eilir Pierce, Dewi Foulkes a Dyl Mei.

Fe allwch wrando eto yn fama!

Mae'r stori am fam Eilir yn rhwygo ei bosteri Michael Jackson yn arbennig o ddoniol, ynglyn a honiadau Dyl Mei fod Jackson wedi "prynu" y moonwalk gan hogyn bach yn Brazil

Glasonbury, SFA, a Llwybr Llaethog

Criw C2 — Wed, 01 Jul 2009 13:12:30 +0000

Helo bawb
Am resymau hir-wyntog a chymleth, mae na newid i amserlen C2 yn yr wythnos nesa. Felly, os da chi am glywed hynt a helynt Huw Stephens yn Glastonbury, caneuon newydd Llwybr Llaethog, neu gyfweliad hefo'r SFA, gwnewch nodyn yn eich dyddiadur!

Nos Iau Gorffennaf 2 - Huw Stephens yn Glastonbury
Nos Wener Gorffennaf 3 - Huw Stephens yn Glastonbury
Nos Lun Gorffennaf 6 - Lisa Gwilym yn cyflwyno tracia newydd gan Llwybr Llaethog
Nos Fawrth Gorffennaf 7 - Lisa Gwilym yn holi Daf Ieuan o'r SFA am eu cynlluniau dros yr haf.

Ac yn ol i'r drefn arferol ar ol hynny!
Diolch
Gar

Yr ail-bit newydd!

Robin Owain Jones — Tue, 30 Jun 2009 22:03:26 +0000

Helo bawb!

Newydd adael stiwdio chwyslyd C2 am wythnos arall, ac yr wythnos yma - yn ogystal a'ch cyflwyno i fand 'Gwyliwch y Gofod' newydd sbon - mi oedd yna ail-bit newydd ar y rhaglen.

Beth yw'r ail-bit newydd yma? Wel bob wythnos ar raglen Magi ar C2, mi fydda'i yn son rhywfaint am fideo gan fand Cymraeg sydd i'w wylio ar y wê - fideo gwahanol bob wythnos. Fel mae'r llygoden-beth bach yn yn ei ddweud yn yr hysbyseb yna ar y teledu... "Simples!"

Y fideo gafodd y fraint o fod y cyntaf un yn y slot newydd yma, oedd Genod Droog - Dal Ni Lawr. Rhaid i fi gyfaddef mai hwn yw un o'n hoff fideos i gan fand Cymraeg ERIOED! Mae o dal yn neud i fi chwerthin yn uchel wrth ei wylio fo, ac mae'n dangos ffraethineb a hiwmor y band i'r dim - band oedd mor hynod o cŵl, ond eto ddim yn cymryd eu hunain rhy o ddifri.

Ges i sgwrs efo Ed Holden o'r band ar y rhaglen, a mi soniodd o ychydig am gefndir y fideo - gath o ei ffilmio ar gyfer cyfres 'Bandit ar S4C' nol yn 2007 - un o fideos cyntaf y band, os na Y fideo cyntaf, ac fe gafodd ei gyfarwyddo gan Daf Palfrey (o Hanner Pei).

Cafodd ei ffilmio mewn canolfan hamdden yn Sblot, Caerdydd, ac yn dangos stori y band mewn twrnament badminton o'r 80au - tydw'i wir ddim yn llwyddo i gyfleu pa mor wych yw'r fideo yma drwy sgwennu amdano, felly pam na ewch chii draw i'w wylio drostoch eich hunain:

Fideo Genod Droog - Dal Ni Lawr RHYBUDD IAITH!!

Nos Fawrth nesaf, bydd gen i fand 'Gwyliwch y Gofod' newydd sbon, a mi fydda'i yn rhoi sylw i fideo arall sydd i'w weld a'r y wê. O, a gyda llaw - dwi'n rhoi rhybudd iaith ar y fideo yma, gan fod yr iaith ychydig yn gref mewn mannau.

Tan y tro nesa,
Rob.

Glastonbury!

Huw Stephens — Mon, 29 Jun 2009 17:01:56 +0000

Wel nawr, roedd Glastonbury yn lot o hwyl a sbri. Ro'n i'n gweithio ar lwyfan y BBC drwy'r penwythnos. Roedd ne fandie hynod o dda yn chware, yn cynnwys Colorama. Bydd tracs byw o set y band oedd yn cynrhychioli C2 yno ar raglenni arbennig nos iau a nos wener wythnos yma. Roedd y Rogues yn dda hefyd, a fydd Sam James hefyd ar y rhaglen. Mae modd gweld fideos o bawb wnaeth chwarae ar y llwyfan ar www.bbc.co.uk/introducing

Nes i bownsio i Blur, a bloeddio gyda Bruce. Roedd Bon Iver yn bleserus, a Tom o Drefforest yn tremendys. Roedd Neil Young yn ifanc ei ysbryd a Status Quo yn sili. Roedd High Contrast o Benarth yn chware drwm a bas boncyrs o uchel, a Bloc Party yn berffaith.

Mae'n wyl anhygoel. Os chi heb fod a'n gallu mynd; ewch. Unwaith yn eich bywyd, mae'n werth e. I ffwrdd o'r llwyfannau mwy mae gymaint i'w weld. Allech chi fynd drwy'r penwthnos heb weld yr un band a chael amser da. Mae pawb yn yr un cwch.

Clywsom ni newyddion trist iawn heddiw. Bu aelod o Colorama, David Fletcher, farw nos Sul, wedi iddo gyraedd adre o berfformio yng ngwyl Glastonbury. Mae ein cydymdeimlad gyda aelodau Colorama, ei ffrindiau a'i deulu i gyd.

Glastonbury - nos Iau.

Huw Stephens — Fri, 26 Jun 2009 12:14:57 +0000

Nes i gyraedd gwyl Glastonbury eleni ar y nos Iau, mewn amser i ddal Gareth Bonello, y Gentle Good. Nath e chware i babell llawn o bobl ( o leiaf mil, os nad mwy) ym mhabell y Queens Head. Nath e set hyfryd, gyda llinynnau yn ymuno gyda fe. Wedyn ath e i Washington ar gyfer wthnos o gigs Smithsonian; mwy am hynny ar C2 wthnos nesa.

Roedd yr Ods yn gwylio Gareth hefyd, cyn eu gig nhw heddiw, ddydd Gwener.

Nes i weld back o Jamie T, a mwynhau set llawn Golden Silvers. Mae nhw'n fand gwych, a'r prif leisydd Gwilym yn amlwg wrth ei fodd gyda'r ymateb; cannoedd tu allan i'r babell methu mynd mewn.

Wedyn, yn y nos, fe ddaeth y glaw. Wedyn, nath Michael Jackson farw. Heddwch i'w lwch.

Rhaglen Michael Jackson - help!!

Criw C2 — Fri, 26 Jun 2009 10:44:24 +0000

Helo 'na.
Mi fydd Lisa Gwilym heno rhwng 10pm ac 11pm yn cyflwyno rhaglen arbennig ar gerddoriaeth Michael Jackson. A dyna'r oll dwi'n wybod ar hyn o bryd!! Ddim yn siwr pa drywydd i fynd, pa westeion... Unrhyw awgrymiadau?
Cofion a diolch
Gar

Gig SFA ym Mangor

Criw C2 — Wed, 24 Jun 2009 11:32:59 +0000

Helo bawb
Maddeuwch i mi os dwi'n dod a newyddion ma pawb wedi ei glywed yn barod, ond rhag ofn nad yde chi'n gwybod.... mi fydd y Super Furries yn chwara gig arbennig i ddathlu penblwydd Prifysgol Bangor yn 125 oed, a hynny yn Neuadd P-J. Dwi'n credu mai ryw 800 o docynnau sydd ar gael - o swyddfa docynnau Galeri.

A bydd Dafydd Ieuan o'r SFA ar raglen Lisa nos Wener i son am y peth!
Cofion
Gar

Ble bynnag fi'n rhoi fy het....

Huw Stephens — Tue, 23 Jun 2009 16:06:15 +0000

Dyna lle na'i gysgu. Fi wedi bod yn teithio eitha tipyn yn ddiweddar. Gynta', roedd Caracas, Venezuela ddim yn rhywle ro'n i erioed yn disgwyl mynd iddi. Ro'n i yno i wneud gweithdai radio drwy'r British Council, ac i djo mewn clwb a gwyl enfawr ar y stryd. Roedd y gweithdai yn hwyl ac yn digwydd yn y 'barrios', ardaloedd tlawd iawn gyda gorsafoedd radio wedi talu amdanynt gan y lywodraeth arlywydd Chavez. Roedd un dj yn ffan mawr o reggae felly nes i adael CD Llwybr Llaethog a Geraint Jarman iddo. Roedd djo i 3000 o bobl yn y nos yn brofiad boncyrs i ddeud y lleia.
Ges i ryw 30 CD o gerddoriaeth newydd o Venezuela, yn cynnwys dubstep. Mae'r genre yma yn parhau i ffynnu, ac mae llwyth o gynhyrchwyr diddorol yn torri drwodd. Yn Sonar, gwyl yn Barcelona, yn fwy diweddar, roedd dubstep i'w glywed bob man. Joker, Martyn a'r Gaslamp Killer oedd yr uchafbwyntiau ag ro'n i yna gyda BBC yn cyflwyno.
Fyddai yn Glastonbury ar y pewnthnos - 'twitterwch' fi os chi yne hefyd. O Gymru fydd Colorama, Yr Ods, Gentle Good, Rogues (band newydd Sam o'r Poppies gynt), Gwibdaith Hen Fran a Georgia Ruth Williams yn chware; wthnos nesa fydd fy rhaglenni wedi eu recordio yn Glasto.