Help / Cymorth
« Blaenorol | Hafan | Nesaf »

Cofio Grav

Categorïau:

Magi Dodd Magi Dodd | 21:11, Dydd Iau, 1 Tachwedd 2007

Ray

Mae'r newyddion trist am farwolaeth Ray Gravell wedi taro ni gyd yn galed iawn. Fel nifer ohonoch chi dwi'n siwr, pan glywes i'r newyddion - nes i ddim credu'r peth. Ma rhaid bo rhyw gamsyniad. Rhywun wedi drysu. Y tro dwetha nes i weld Grav roedd e llawn bywyd ac egni. Yn chwerthin ac yn jocian fel arfer. Roedd deall nad oedd na gamgymeriad wedi bod - a bo Grav wedi'n gadael - yn ergyd drom iawn.

Roedd fy ffrind gore Emma yn gweithio'n agos â Grav - ac fe ddaeth y ddau yn ffrindiau penna' - a thrwy hynny, bues i'n ddigon ffodus i ddod i'w nabod hefyd. Bydde Grav yn brasgamu mewn i'r swyddfa a fydde pawb yn troi pen a gwenu. Bydde Grav yn cyfarch BOB UN ohonom ni yn unigol. Roedd ganddo lys enwau i ni gyd. Fy un i oedd Abergwaun a hynny gan fy mod unwaith wedi gwisgo crys T coch Eisteddfod Abergwaun. Roedd y lliw coch wedi denu ei lygaid - ac o hynny mlaen - Abergwaun o ni! Roeddwn ni mor chuffed bo gan yr arwr Ray Gravelle lys enw i fi! Ond pan odd Grav yn siarad da chi, roeddech ch'n anghofio eich bo chi'n siarad gyda arwr y bêl hirgron, actor llwyddiannus a darlledwr proffesiynol a phoblogaidd - achos roedd e'n eich trin chi fel ffrind. Roedd e'n trin pawb yr un peth - os oeddech chi'n lanhawraig neu'n neud y te neu yn gynhyrchydd neu yn bwy bynnag - roedd Grav yn trin pawb fel un o'i ffrindiau gore. Roedd e'n neud i chi deimlo fel chi oedd yr unig berson yn yr ystafell.

Ma llawer o bobol yn son am haelioni Ray Gravelle, ond nes i brofi ei garedigrwydd pan nath brawd fy nghariad fynd yn sâl. Ma Rhys yn ffan mawr o'r sgarlets felly nes i ofyn i Grav os fydde fe'n fodlon arwyddo llun i fynd wrth ei wely yn yr ysbyty. Oooo na! Doedd hynny ddim yn ddigon! Nath Grav fynd ati i sgwennu neges bersonol i Rhys, arwyddo llun, recordio neges ac addo dau docyn i gêm y Sgarlets iddo pan oedd yn well. A hyn i gyd i rhywun doedd e erioed wedi cwrdd.

Dwi'n teimlo hi'n fraint bo fi 'di cwrdd ag un o wir arwyr ein cenedl - ac y boi mwya neis yn y byd i gyd.

Y cydymdeimlad dwysaf i Mari, Gwenan a Manon - ryn 'ni gyd yn meddwl amdanoch chi.

Llywio drwy’r BBC

BBC © 2014 Nid yw'r BBC yn gyfrifol am gynnwys safleoedd allanol.

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.