Mae'n ymddangos fod y cynllun o gael Uwchgynghrair a fyddai'n cynnwys deuddeg tîm, yn mynd i arwain at 44 o gemau yn yr Uwchgynghrair (pawb yn chwarae ei gilydd bedair gwaith) - golyga hyn y bydd yna ddeg gêm yn fwy yn cael eu chwarae nac o dan y drefn bresennol.

Gyda chystadlaethau Cwpan ac yn y blaen yn ychwanegol, ymddengys y bydd llawer o'r timau yn chwarae tua 60 o gemau o dan y drefn yma.

A dyna sail yr helynt newydd.

Tydi timau rhan amser, sydd â chyllid cyfyngedig ddim am fod yn hapus os fydd yna estyniad i'r tymor, a fyddai'n golygu talu chwaraewyr yn wythnosol, am gyfnod hirach na'r presennol.

Enghraifft arall hwyrach i wneud i rywun feddwl mai timau llawn amser mae'r Uwchgynghrair yn chwilio amdanynt - ond a fydd hyn yn bosibl o fewn gwlad fechan fel Cymru a'i sefyllfa economaidd?

Ai saethu ei hun yn ei droed mae'r Uwchgynghrair newydd, neu osod safonau a wel dim ond rhyw ddau neu dri chlwb yn llwyddo - os felly, bydd yna ddim byd newydd yn debygol o ddatblygu!

Ai dyma'r dull orau i ddatblygu'r Uwchgynghrair?

Beth yw eich barn ? Gadewch i ni wybod.

Heb os, mae hon yn un o gemau mwyaf atyniadol y tymor.

Mi fydd torf o dros ddeugain mil yn bresennol i wylio'r tîm sydd yn bedwerydd yn erbyn y ceffylau blaen.

Mae Newcastle wedi cyrraedd y safle yna wedi buddugoliaeth yn Preston nos Lun tra roedd Abertawe wedi curo Derby ar y nos Wener gyda gôl wefreiddiol gan Federico Bessone.

Ac roedd y gôl honno yn cadarnhau statws haeddiannol Abertawe ar y funud fel y tîm gorau yng Nghymru.

Roedd bron i ddeunaw mil yn y Liberty a hynny yn dangos fod y cefnogwyr yno yn credu yn yr hyn mae Paulo Sousa yn ei wneud.

Fe gafodd Sousa ddechrau anodd, yn etifeddu carfan oedd yn dioddef gydag anafiadau, yn etifeddu sefyllfa anodd yn sgil ymadawiad Roberto Martinez a'i staff ynghyd â dau chwaraewr allweddol i Wigan Athletic.

Ond mae o bellach wedi creu tîm sydd yn anodd iawn i'w curo, ond yn parhau i chwarae pêl-droed atyniadol, amyneddgar a chreadigol.

Mae Chris Hughton wedi llwyddo hefyd yn dilyn cychwyn anodd yn Newcastle - yn colli eu statws yn yr Uwch Gynghrair, yr holl sôn am Mike Ashley am werthu'r clwb a'r cefnogwyr yn dyheu am enw mawr fel Alan Shearer yn rheolwr.

Ond mae llwyddiant Hughton, yn uno carfan, yn sicrhau canlyniadau positif yn dangos nas oes rhaid ar enw a phersonoliaeth amlwg.

Mae yna sawl peth sy'n cysylltu Abertawe a Newcastle.

Roedden nhw yn arfer dweud mai'r ardaloedd yma oedd yn gyfrifol am feithrin y rhan fwyaf o dalent ifanc o fewn eu milltir sgwâr.

Y cysylltiad amlycaf a'r enwocaf mae'n debyg fyddai Ivor Allchurch, un o'r chwaraewyr gorau erioed gafodd ei anfarwoli gan gefnogwyr y Vetch a Pharc St James.

Beth bynnag fydd yn digwydd y penwythnos yma does dim rheswm yn y byd na fydd y ddau dîm yma yn brwydro am le yn yr Uwch Gynghrair ar ddiwedd y tymor.

A sôn am y brif adran a'r cysylltiad ag Abertawe, braf fyddai gwybod beth oedd ymateb cefnogwyr Abertawe i'r newyddion o White Hart Lane ddydd Sul.

Sousa yw'r arwr bellach ond mae llawer o gefnogwyr o hyd wedi digio â Roberto Martinez wedi iddo adael y clwb yn yr haf.

Mae'n amlwg fod Martinez yn rheolwr ifanc talentog ond mi fydd y gweir yna yn Tottenham o naw i un yn brawf pendant o'i ddawn fel rheolwr.

Yr eironi mwyaf fyddai pe bai Wigan ag Abertawe yn cyfnewid statws ar ddiwedd y tymor.

Y cyffro yn y Sudan, canlyniad gwych i Slofenia yn erbyn Rwsia a'r holl ddadlau yn Iwerddon yn sgil yr hyn ddigwyddodd yn y gêm ym Mharis.

Mae'n siŵr fod llawer ohonoch chi sydd yn darllen hwn yn ymwybodol ac efallai hyd yn oed yn cofio llaw Joe Jordan yn Anfield yn 1977.

Tafliad i'r Alban a Jordan blaenwr yr Albanwyr yn llawio a'r dyfarnwr yn rhoi cic o'r smotyn i'r Albanwyr o bawb.

Don Masson yn sgorio heibio Dai Davies a Chymru unwaith eto yn boddi wrth ymyl y lan. Hyd heddiw mae'r digwyddiad yn dal i boeni a brifo capten Cymru ar y noson Terry Yorath.

Mae Lloegr yn son yn aml am law Duw, pan lawiodd Diego Maradona y bêl yn rownd wyth olaf Cwpan y Byd yn 1986.

A bellach mi fydd y Gwyddelod yn hawlio fod Thierry Henry wedi twyllo wrth lawio'r bêl nid unwaith ond ddwywaith cyn i Gallas benio i'r rhwyd a sicrhau lle i Ffrainc yn y rowndiau terfynol yn Ne'r Affrig flwyddyn nesaf.

Bu son am alw ar Fifa i ail chwarae'r gêm ond doedd hynny byth am ddigwydd.

Ac a bod yn onest pe bai rai o chwaraewyr Iwerddon wedi manteisio ar y cyfleoedd yna fyddai'r ddadl ddim wedi codi yn y lle cyntaf.

Dyna yn ddiddorol oedd ymateb Roy Keane.

Teg dweud nad oes fawr o gariad rhwng Keane a chymdeithas bêl-droed Iwerddon ond yn ôl rheolwr Ipswich yr un hen glochdar a swnian oedd yn dod gan y Gwyddelod, yn cwyno am hyn a'r llall yn lle derbyn iddyn nhw fethu cyfle gwych i gyrraedd y rowndiau terfynol a doedd neb arall i feio ond eu hunain.

Ond mae'n siŵr y bydd Llywydd Uefa, Michel Platini yn ddigon bodlon.
Yr Aifft yn ennill o ddwy i ddim a hynny yn golygu gêm arall mewn gwlad niwtral .Chwaraewyd y drydedd gêm rhwng y ddwy wlad yn y Sudan ganol yr wythnos gydag Algeria yn ennill o gôl i ddim.

Cymaint yw'r siom a'r atgasedd yn yr Aifft maen nhw yn bygwth peidio â chwarae pêl droed rhyngwladol yn y dyfodol.

Er dyw'r atgasedd ddim mor wael ag yr oedd o yn 1970 rhwng El Salvador a Honduras. El Salvador enillodd a chyrraedd y rowndiau terfynol ym Mecsico. Arweiniodd hynny at ryfel rhwng y ddwy wlad. Anhygoel.

Roedd canlyniad Slofenia yn anhygoel, gwlad mor fach yn curo Rwsia oedd wedi gorffen yn ail yng ngrŵp Cymru. Mae Rwsia wedi buddsoddi miloedd yn y gêm ac wedi talu cyflog anrhydeddus i Guus Hiddink felly mi fydd y siom yn aruthrol.

Siom efallai hefyd i Fifa gyda sawl un yn amau eu bod yn gwneud eu gorau glas i wneud yn siŵr mai'r gwledydd mawr a phwerus gyda'r arian sydd yn cyrraedd y rowndiau terfynol.

Ond yr hyn ddenodd fy sylw i yn fwy na dim oedd digwyddiadau ar ac oddi ar y cae rhwng Aifft ac Algeria. Saith deg pump o filoedd yn y cae a 15,000 o filwyr a heddlu i gadw trefn rhwng dwy wlad oedd fel pe bai nhw yn casáu ei gilydd.

Os fu tystiolaeth erioed i ddefnyddio technoleg mewn gemau allweddol, yna fe ddaeth yr awr pan ddefnyddiodd Thierry Henry ei law i reoli'r bêl cyn croesi a gweld William Gallas yn sgorio i guro Gweriniaeth Iwerddon ac anfon Ffrainc i ffeinals Cwpan y Byd.

Welodd y dyfarnwr ddim, welodd cynorthwywyr y dyfarnwr ddim, a bydd Iwerddon yn gweld dim o'r cyfoeth ariannol a fydd yn llifo i Ffrainc yn sgil y twyllo.

Mae yna rywfaint o ymdrech wedi ei wneud i geisio datrys digwyddiadau dadleuol yng ngheg y gôl yng nghystadlaethau Cwpan Europa.

Gwelais Everton yn chwarae Benfica yn ddiweddar gyda dau is-ddyfarnwyr yn sefyll wrth geg y naill gôl a'r llall.

Ar noson oer roedd y ddau is-ddyfarnwr yn ysu am gael rhywbeth i'w wneud - unrhyw beth, a phan oedd y bêl yn cyrraedd y pen pellaf o'r cae, roedd yr is-ddyfarnwyr yn crwydro gan sefyll wrth ochor y golwr rhywle o gwmpas y smotyn gwyn yng nghanol y cwrt cosbi.

Ni wnaeth yr un ohonynt unrhyw gyfraniad, ac yn wir y farn gyffredinol ydi fod yna ddau ddyfarnwr arall mewn gemau o'r fath, ac yn barod i gymhlethu bywyd chwaraewyr yn fwy byth!

Mae'r amser wedi dod i ddefnyddio technoleg mewn gemau pêl-droed, yn union fel ac a geir mewn gemau rygbi, neu tennis, er enghraifft.

Mae Joe Jordan yn cael ei gofio am dwyllo, mae Diego Maradona yn cael ei gofio am gyfeirio at Law Duw wrth iddo hefyd dwyllo.

Yr wythnos yma, mae Llaw'r Llyffant wedi llwyddo i anfon Ffrainc a Henry i Ffeinals Cwpan y Byd!

Ond tybed sut y bydd cefnogwyr pêl-droed yn cofio Thierry Henry yn y dyfodol?

Mae llawer o hyfforddwyr a rhieni yn ceisio argyhoeddi chwaraewyr ifanc na ddaw unrhyw lwyddiant wrth dwyllo.

Ceisiwch eu hargyhoeddi o hyn yn sgil gweithred Thierry Henry, ac absenoldeb technoleg gyfoes!

Roedd yr hanner cyntaf yn un cyffrous, llawn digwyddiad ac roedd Cymru wedi'r 10 munud agoriadol tipyn gwell na thîm George Burley.

Roedd sawl peth positif o'r gêm. Yn gyntaf ac yn bennaf y canlyniad. Mi wnaiff hynny fod o les i hyder y chwaraewyr a chynnig gobaith i'r cefnogwyr. Mi roedd safon y chwarae yn uchel yn enwedig y gwaith creadigol wrth greu'r tair gôl. Mi chwaraeodd Aaron Ramsey ran allweddol yn y tair, yn cynorthwyo i greu dwy a sgorio'r drydedd ei hun.

Nid fod popeth yn bositif. Roedd maint y dorf yn hynod siomedig. Ychydig dros 13,000 a dros 5,000 o'r Alban.

Mae'r Gymdeithas Bêl-droed yn gobeithio penodi Prif Weithredwr yr wythnos yma. Wel, cadarnhau'r penodiad beth bynnag. Ac mae'n amlwg fod yna waith aruthrol yn ei wynebu o ran gwella delwedd y Gymdeithas a marchnata'r gêm.

Dyma oedd y gêm ryngwladol gyntaf yn y stadiwm newydd a does dim dwywaith fod yr awyrgylch yn well yno ac yn sicr roedd y chwaraewyr yn edrych yn gyfforddus. Dwi'n siŵr mai yma y bydd Cymru yn chwarae y rhan fwyaf o'u gemau rhagbrofol ym Mhencampwriaethau Ewrop.

Un peth sydd wedi denu ymateb wedi'r gêm yw rôl Dean Saunders. Yn ddirprwy reolwr ar Gymru ac yn rheolwr ar Wrecsam, a thra roedd Cymru yn ennill yn gyfforddus roedd ei glwb yn dioddef canlyniadau ofnadwy wrth golli gartref o 2-0 yn erbyn Hayes a Yeading.

Mi ddeudais i ar y radio cyn y gêm mae lle Dean Saunders oedd gyda'i glwb er bod ganddo gytundeb yn ei ryddhau ar gyfer gemau rhyngwladol.

Roedd y tîm wedi mynd ar rediad o chwe gêm heb golli ac roedd pethau yn dechrau gwella. Ond mae hynny i gyd wedi newid yn sgil un canlyniad a pherfformiad. Dwi'n siŵr y gallai fod wedi gadael carfan Cymru ar y dydd Iau a bod gyda'i glwb ar y dydd Gwener.

Efallai bod Dean yn teimlo yn wahanol ond pan mae pethau yn mynd o'i le yna'r rheolwr sydd yn derbyn y cyfrifoldeb. Ac mae'n rhaid iddo dderbyn y feirniadaeth.

Mae cefnogwyr Wrecsam yn ysu i weld y tîm yn dychwelyd i gynghrair Lloegr, dydi colli yn erbyn Hayes a Yeading ddim yn dderbyniol ac mae o'n waeth pan nad yw'r rheolwr yno. Fyddai cefnogwyr Caerdydd yn derbyn absenoldeb Dave Jones, fyddai cefnogwr Abertawe yn derbyn absenoldeb Paulo Sousa? Mae'r ateb yn syml.

I ddangos fel mae pethau wedi newid ers hynny yn nhîm yr Alban y diwrnod hwnnw roedd Tommy Gemmill, Bobby Murdoch a Billy McNeill, tri oedd wedi chwarae dwy flynedd yn gynharach i Celtic yn erbyn Inter Milan yn rownd derfynol Cwpan Ewrop.

Yn y tîm hefyd roedd Billy Bremner, capten Leeds United oedd newydd ennill y bencampwriaeth yn Lloegr am y tro cyntaf.

Yn chwarae dros Gymru roedd Gary Sprake, hefyd o Ledes, y rheolwr presennol John Toshack a dau gawr arall yn y llinell flaen, Ron a Wyn Davies. Yr Alban enillodd o bump i dair.

Chwaraewyd sawl gêm gofiadwy a dadleuol rhwng y ddwy wlad dros y blynyddoedd. Yr un mwyaf cofiadwy oedd yn rowndiau rhagbrofol Cwpan y Byd yn Anfield yn 1977. Chwaraewyd y gêm yno oherwydd trafferthion ar Barc Ninian yn 1976 yn rownd wyth olaf Pencampwriaethau Ewrop rhwng Cymru ac Iwgoslafia.

'Dwi'n cofio teithio i Lerpwl a chael fy synnu fod cynifer o Albanwyr yn y ddinas. Ble roedd y Cymry? Roedd poced fach ohonom ni ar y Kop ac mi roedd hi yn brofiad anesmwyth y noson honno.

Roedd yna ochenaid o ryddhad pan drawodd John Toshack y bar yn lle sgorio.

Doedd hi ddim tan ar ôl y gêm inni sylweddoli mai Joe Jordan oedd wedi llawio'r bêl arweiniodd at gic o'r smotyn Don Masson. Kenny Dalglsih sgoriodd yr ail.

Y ddwy gêm arall sydd yn aros yn y cof oedd y ddwy yn 1985 pan sgoriodd Ian Rush yn Hampden a'r gêm chwaraewyd ar Barc Ninian yn yr un flwyddyn.

Dyma'r gêm orffennodd yn gyfartal â Chymru yn colli cyfle arall o gyrraedd rowndiau terfynol Cwpan y Byd. Ond yn gysgod dros y cyfan oedd marwolaeth Jock Stein eiliadau wedi'r gêm.

Roeddwn ni wedi cyfarfod Stein, un o gewri'r gêm, yn gynharach yn yr wythnos ar gae ymarfer Bristol Rovers. Dyna ble roedd yr Albanwyr yn paratoi a rheolwr Rovers bryd hynny oedd Bobby Gould, ddaeth yn rheolwr ar Gymru yn ddiweddarach wrth gwrs.

Beth am y gêm y penwythnos yma felly?

Dwy wlad wedi gweld dyddiau gwell, dwy wlad yn paratoi ar gyfer y dyfodol. Yn sicr mae'r Albanwyr wedi gwella ers y gêm ddiwethaf yn eu herbyn yn 2004 tra mae Cymru wedi mynd am yn ôl.

Dyma'r gêm gyntaf ym maes newydd Caerdydd a tybed fydd y tîm yn ymateb i hynny. Mae nhw yn falch o ffarwelio â Stadiwm y Mileniwm am y tro a gobeithio y gwelwn ni welliant yn y gefnogaeth.

A sut ymateb tybed gaiff Ashley Williams fel capten ar ei wlad?

Mae hi wedi bod yn wythnos gofiadwy iddo. Yn chwarae i Abertawe wrth iddyn nhw guro Caerdydd ac yna'n cael ei anrhydeddu fel chwaraewr y flwyddyn nos Fercher cyn cael ei ddewis i arwain ei wlad. A fydd cefnogwyr Caerdydd yn anghofio ei gysylltiad ag Abertawe? Gobeithio'n wir.

Beth ydi'ch barn chi am dîm presennol Cymru? Beth ydi'r ymateb i chwarae gemau yn y stadiwm newydd yng Nghaerdydd?

Bydd Cymru, fel yr arferiad diweddar, yn rhoi tîm ifanc ar y cae, gyda chyfle unwaith eto i'r chwaraewyr ennill profiad a dangos eu gallu ar lefel ryngwladol.

Amser hefyd i drafod cyfraniad John Toshack, gyda nifer yn credu ei bod yn amser iddo gamu i'r adwy a gadael i rywun arall reoli yn ei le.

Cyn rhuthro i'w feirniadu, rhaid gofyn beth mae Toshack wedi ei gyflawni ac a ydi o wedi sefydlu strwythur gwell ar gyfer datblygu chwaraewyr rhyngwladol, na'r drefn a etifeddodd?

Yr ateb i hyn, er nad ydym wedi llwyddo i gyrraedd Rowndiau Terfynol Cwpan y Byd, ydi fod y strwythur presennol wedi llwyddo i ddatblygu chwaraewyr yn un llawer gwell nac a welwyd yn y gorffennol.

Gall Brian Flynn a'i garfan dan21 oed dderbyn llawer o'r clod, ond Toshack oedd y tu ôl i'r ailwampio.

Cyn penodi Toshack i'r swydd, roedd nifer fawr yn credu fod swydd y rheolwr newydd am fod yn un anodd, gan fod cymaint o chwaraewyr profiadol wedi dod i ddiwedd eu gyrfa ryngwladol, a'r rhai ifanc yn rhy ddibrofiad i wneud argraff.

Roedd llawer o'r farn mai'r olynydd ( i Toshack) a fyddai yn y sefyllfa orau, wrth etifeddu carfan a fuasai, mewn amser, wedi aeddfedu a datblygu.

Mae'r chwaraewyr ifanc yn prysur aeddfedu, yn ennill profiad ac yn datblygu'n dda.

Onid yw'n deg felly, i ofyn oni ddylai Toshack arwain Cymru ymhellach, cyn gweld rhywun arall yn cael y cyfle i'n harwain at lwyddiant ar sail ffrwyth, llafur a strwythur datblygiadol ac effeithiol y rheolwr presennol?

Ydych chi'n cofio Ronnie Radford yn sgorio i Henffordd (aelodau o'r Southern League bryd hynny) gan chwalu gobethion Newcastle United Malcolm McDonald o ddwy gôl i un mewn gêm ail chwarae yn Henfordd yn 1972 - neu goliau Mickey Thomas a Steve Watkin yn suddo Arsenal yn 1992?

I mi, y gamp orau oll, a'r sioc fwyaf oedd gweld Sutton United gan gynnwys y Cymro Robyn Jones, yn curo deiliad y Gwpan, Coventry City o ddwy gôl i un yn 1989.

Mae'r gemau yma wedi dod yn rhan o lên gwerin pêl-droed erbyn heddiw, ond faint ohohom sydd yn ymwybodol o'r ffaith mai Abertawe oedd y tîm cyntaf y tu allan i brif gynghreiriau Lloegr, i guro tîm o'r hen adran gyntaf yn y Gwpan?

Ionawr 9, 1915 oedd y dyddiad, ac fe roedd y Rhyfel Mawr wedi dechrau y Medi blaenorol gyda'r wlad yn credu y byddai popeth drosodd erbyn y Nadolig, a bywyd, megis gemau pêl-droed yn cario ymlaen yn ôl yr arfer.

Erbyn mis Ionawr fodd bynnag, doedd dim golwg ar derfyn y Rhyfel, a daeth llawer o fobol i sylweddoli maint yr hunllef, wrth i gynifer o'u hanwyliaid gael eu lladd ym mrwydrau y ffosydd yng Ngwlad Belg.

Yn sgil hyn, roedd parhau gyda gemau pêl-droed yn dod yn rhywbeth afiach yn llygaid y cyhoedd, gyda'r chwaraewyr yn cael eu hystyried fel bradwyr.

Serch hynny, death 16,000 i gae y Vetch gan weld hanes yn cael ei greu yng Ngwpan Lloegr.

Blackburn Rovers oedd yr ymwelwyr, deiliad y Gwpan, tra roedd llinell flaen y Swans yn cael ei arwain gan lanc un ar bymtheg oed, Benny Benyon, a ymunodd gyda Abertawe dim ond am fod gemau rygbi wedi cael eu hatal oherwydd y Rhyfel.

Llwyddodd Benyon i wneud mwy nac arwain - fe sgoriodd unig gôl y gêm, gydag Abertawe yn dod yn enwog fel y cyntaf i guro tîm o'r adran gyntaf, a hwythau hefyd newydd ennill Pencampwriaeth yr Adran Gyntaf y tymor blaenorol.

Ohwerwydd y gwrthwynebiad a oedd yn brysur godi yn erbyn pêl-droed yn sgil erchyllterau y Rhyfel, ni chafodd Abertawe y cyhoeddusrwydd teilwng am eu buddugoliaeth.

Ar ddiwedd tymor 1914-15, atalwyd pob cystadleuaeth pêl-droed, aeth Benyon i'r rhyfel, ac wedi iddo ddychwelyd yn 1918, fe ail ymunodd gyda chwb rygbi Abertawe a chael ei dewis i chwarae dros Gymru yn erbyn Lloegr a'r Alban yn 1920.

Does ryfedd fod yna gymaint o ramant yn y Gwpan - mae'n hen ystrydeb efallai ond tydi pethau fel yna ddim yn digwydd heddiw!

Mae'n dod yn eithaf amlwg fod chwaraewyr na chaiff eu lle yn gyson mewn timau yn Uwchgynghrair Cymru yn ymuno gyda chlybiau mewn cynghreiriau is.

Ond yn ôl y rheol a wnaed gan bwyllgor penodol o Gymdeithas Bêl-droed Cymru, nid yw yn bosibl i glwb o'r Uwchgynghrair arwyddo unrhyw un, hyd nes y ffenestr drosglwyddo ym mis Ionawr.

Pwy ar wyneb y ddaear a feddyliodd am gynllun mor hurt?

Ac onid hap neu ddamwain yw hi mai aelodau o'r Gymdeithas, sydd eu hunain â chysylltiad agos ac is-gynghreiriau, sydd wedi creu'r rheol yma?

Mae Porthmadog eisoes wedi gorfod wynebu'r sefyllfa ble mae cael hyd i garfan lawn yn dod yn anodd heb orfod cynnwys chwaraewyr ifanc dibrofiad o'r tîm ieuenctid.

A chyn i rywun ymfalchïo drwy ddweud mai dyma'r ffordd i'w datblygu, gallaf eich sicrhau mai nid mewn tîm sydd yn ei chael yn anodd ar waelod cynghrair, mae datblygu dyfodol a hyder ieuenctid.

A yw'n bosibl i ni weld, cyn hir, gêm yn yr Uwchgynghrair yn cael ei gohirio am na all un o'r timau roi un a'r ddeg o chwaraewyr ar y cae?

Ai hyn oedd ym meddwl y pwyllgor doeth wrth iddynt fynd ati i newid y rheolau?

Mae llawer i chwaraewr wedi cael ei alw o flaen ei well am ddod ac anfri ar y gêm am bob math o resymau.

Ond yn sgil y penderfyniad yma ynglŷn ag arwyddo chwaraewyr, onid yw hi'n amser i aelodau'r pwyllgor a greodd y rheolau newydd, hefyd ymateb i gyhuddiad tebyg oherwydd y llanastr maent wedi ei greu yn yr Uwchgynghrair eleni?

Ydi'r diwedd yn agosau i Rafa Benitez? Gyda'r tîm yn sefyll yn ei unfan heb ddatblygu, yn union fel ac y gwnaeth tîm Gerard Houllier o'i flaen, does dim osgoi'r farn fod Lerpwl yn or-ddibynnol ar Stephen Gerrard a Fernando Torres, a heb y ddau yma, does gan y tîm fawr i'w gynnig.

Mae timau llwyddiannus Lerpwl, dros y blynyddoedd, wedi dangos nifer o rinweddau, ac roedd cynnwys nifer o chwarewyr gyda chymeriad a'r gallu i arwain yn un o'r cryfderdau allweddol ; ond nid mwyach.

Gyda blaenwr mor aneffeithiol â David Ngog, chwaraewr canol cae ddiddychymyg fel Lucas, ac Andrey Voronin yn cyfrannu dim, mae'n amlwg nad oes yna naill na chymeriad na gallu mewn dyfnder yn y garfan.

Y tu ôl i hyn i gyd mae sefyllfa fregus Lerpwl oddiar ar y cae yn gwneud pethau'n waeth. Hwyrach, fodd bynnag, y gall hyn fod yn achubiaeth i Benitez gan mai prif flaenoriaeth y clwb ar hyn o bryd yw sicrhau y dyfodol, yn hytrach na phenodi rheolwr newydd.

Yn sgil hyn, fodd bynnag, a yw hi'n fwy tebygol o weld Benitez yn cerdded os na chaiff o'r sicrwydd y byddai yna adnoddau ariannol ar ei gyfer, mor fuan ag sydd bosibl, er mwyn, unwaith eto, gryfau ac ail strwythuro y tîm?

Mae cyllid a threfn Lerpwl wedi ei drefnu ar gyfer llwyddo yn yr Uwchgynghrair a chymhwyso ar gyfer Cynghrair Pencampwyr Ewrop.

Petae y clwb yn methu a sicrhau y llwyddiant angehrheidiol i gyflawni hyn, ynghyd â'r arian a'r cyllid i'w gynnal, gall dyfodol y clwb ddod yn fwy fregus byth, a nid yn unig dyfodol Benitez yn y fantol, ond hefyd dyfodol y clwb yn gyfangwbwl.

Os fydd selogion y Kop yn gwynebu sefyllfa lle bydd Lerpwl "heb dân, heb wely," - yna bydd rhaid iddynt "wylo wers", a "thewi wedyn" am hynny o bosib, am byth!

Petae hyn yn digwydd i Lerpwl, faint o amser a fyddai yn ei chymeryd cyn gweld clybiau eraill yn cwympo yn yr un modd?

Wedi dweud hynny, tydi Cymru heb lwyddo i gyrraedd rowndiau terfynol unrhyw gystadleuaeth pêl-droed ers peth amser, ac wedi cael mwy na thri chynnig i wneud hynny!

Fodd bynnag, mae FIFA wedi penderfynu fod yna restr o ddetholion am fod ar gyfer gemau ail gyfle Cwpan y Byd,

Methodd Ffrainc, a oedd yn ddetholion ar gyfer y gemau rhagbrofol, ac ennill eu grŵp ac fel Gweriniaeth Iwerddon, Slofenia ac eraill, rhaid bydd chwarae gemau ychwanegol.

Ar ddechrau'r gystadleuaeth, doedd yna ddim son am drefnu detholion ar gyfer y gemau yr ail gyfle.

Ond ymddengys fod FIFA, fel llawer o gyrff eraill yn y byd pêl-droed yn anwybyddu cyfleoedd cyfartal ac am wneud unrhyw beth i sicrhau fod rhai gwledydd, sydd yn fwy tebygol o ddenu gwylwyr teledu, yn cymryd rhan yn ffeinals Cwpan y Byd, doed a ddel.

Wedi'r cwbwl pwy sydd am ruthro i weld Bosnia-Herzegovina yn chwarae yn erbyn Slofenia os gellir trefnu cystadleuaeth lle y gellir gwella'r siawns o weld Ffrainc yn erbyn Portiwgal?

Ai chystadleuaeth deg, sydd yna erbyn heddiw , neu benderfyniadau sydd yn ceisio sicrhau fod gwledydd a all ddenu arian i gronfa FIFA yn cael eu lle yn sioe fwyaf y byd pêl-droed?

Detholion FIFA ar gyfer y gemau ail gyfle:

Ffrainc
Rwsia
Portiwgal
Gwlad Groeg

A'r rhai na chafodd eu dethol:
Wcrain
Gweriniaeth Iwerddon
Bosnia-Herzegovnia
Slofenia

Bydd angen curo y Ffindir a Liechtenstein - ond tydi hyn ddim ym amhosibl.

Mae yna ddigon o sylw yn caei roi i'r ffaith mai carfan o chwaraewyr ifanc sydd gennym, ond onid yw'r amser wedi cyrraedd pan y mae'n bryd i ni gyd roi'r gorau i gynnig esgusion pan mae pethau yn mynd yn groes, a dechrau disgwyl canlyniadau sydd yn rhoi hygrydedd i allu ein tô newydd.

Mae'r tîm dan un ar hugain wedi dangos y ffordd, ac wedi gwneud eu gwaith i sicrhau safonau uchel ar gyfer y dyfodol.

'Come on Cymru' felly, - dyma'r amser i ddechrau dangos cysondeb ar y lefel uchaf - cyrraedd y trydydd safle, a pharatoi ffordd well ar gyfer y dyfodol.

Does ond obeithio hefyd y bydd rhai o sêr hynaf Cymru yn parhau gyda'r garfan i ychwanegu profiad.

Daeth y sylwebydd yma i farn fod llawer o anawsterau yn cael eu hwynebu drwy ail-drefnu, gan greu'r ddelwedd o drefn a chynnydd, tra mewn gwirionedd roedd yr ail-drefnu parhaus yn creu dim mwy na dryswch, dadrith ac yn debygol o ladd ysbryd y garfan!

Mi es i weld Wrecsam ganol wythnos!

Roedd yna ddryswch mawr ymysg y cefnogwyr, a rhai yn ymddangos fel eu bod wedi eu dadrithio yn barod, yn dilyn canlyniadau siomedig, a'r anallu i sgorio.

Roedd hon felly, sef y gêm yn erbyn Luton, yn un bwysig.

Rhywsut neu'i gilydd roedd y Cadfridog Saunders wedi ail-drefnu pethau yn gywir, gyda Wrecsam yn dangos mwy o allu mewn awr a hanner na ddangoswyd ganddynt mewn tair gêm flaenorol.

Tybed a yw hyn wedi rhoi hwb i'r ysbryd?

Alla'i ond gobeithio na fydd yna ormod o ail-newid ac ail-drefnu yn y dyfodol agos, ac nad ydi carfan Wrecsam wedi dechrau dadrithio a drysu.

Bydd y gemau nesaf felly llawn mor bwysig, gyda'r gêm yn erbyn Caer bnawn Sul yn rhoi'r cyfle i beidio ag ail-drefnu yn ormodol am unwaith.

Y Sadwrn diwethaf cythruddodd Emmanuel Adebayor holl gefnogwyr ei gyn glwb, Arsenal, wrth iddo ymestyn ei goes a tharo ei gyn cyd-chwaraewr Robin van Persie ar ei ben yn y gêm rhwng Manchester City ac Arsenal.

Os nad oedd hyn yn ddigon ynddo'i hun i ypsetio pawb, llwyddodd i sgorio, cyn rhedeg hyd y cae a dathlu yn bryfoclyd o flaen cefnogwyr ei gyn glwb, ond a oedd hefyd, fel cefnogwyr, yn feirniadol ohono tra oedd yn chwarae i'r Arsenal.

Aeth ati ar ôl y gêm i ymddiheuro am foesymgrymu o flaen y Gooners, ond erbyn hynny , mae'n debyg ei fod wedi cael ei orchymyn i wneud hynny er mwyn lles ei hun, ac o bosib er mwyn lleihau'r adwaith.

'Mae angen dyn cymwys doeth, i drin creadur annoeth', meddai cynghanedd arall; os felly bydd rhaid i Mark Hughes ddangos doethinebau Solomon os am gadw trefn ar Adebayor yn y dyfodol.

Hwyrach fod doethineb Arsene Wenger wedi arwain iddo ddod i'r canlyniad fod cadw trefn ar y blaenwr yn ormod o drafferth, a hwyrach dyna pam yr oedd Wenger yn hapus o weld Adebayor yn mynd i rywle arall i chwilio am gêm.

Rhyw bythefnos yn ôl, gwelwyd ffrwgwd ymysg cefnogwyr yn y gêm rhwng West Ham a Millwall. Oni all chwaraewyr ddod i ddeall fod ganddynt gyfrifoldeb i gadw trefn ar eu hunain a bod cyflyru a gwawdio cefnogwyr timau eraill, mewn dull lle y gallant greu storm mewn stadiwm, fod yn hollol wallgo' ac anghyfrifol.

Mae Mark Hughes eisoes wedi ceisio lleihau gweithrediadau ac ymddygiad Adebayor, ond tydi Arsene Wenger ddim yn rhannu'r doethineb neu'r esgusion yma.

Onid oes yna berygl i'r esgusion arwynebol wneud i chwaraewyr y dyfodol feddwl fod ymddwyn fel tarw cynddeiriog o ddyn bonheddig fod yn hollol dderbyniol cyn belled a'u bod yn barod i gynnig ymddiheuriad cyhoeddus am eu gweithrediadau.

Tybed serch hynny, beth oedd cynnwys y sgwrs breifat rhwng Hughes ac Adebayor y tu ôl i'r llenni?

Gyda Wrecsam yn colli ar Faes y Lamb nos Fawrth, ac edrych fel oen ar y ffordd i'r lladdfa, mae Cymdeithas Bêl Droed Cymru wedi cyhoeddi eu bod yn awyddus i chwarae gemau rhagbrofol Cwpan y Byd a Phencampwriaethau Ewrop ar feysydd heblaw Stadiwm y Mileniwm yn y dyfodol.

Stadiwm newydd Caerdydd, y Liberty yn Abertawe a Pharc y Scarlets yn Llanelli ydi'r lleoliadau dan ystyriaeth.

Ond ni fydd y Cae Ras yn Wrecsam yn cael ei ystyried hyd nes i'r stadiwm gael ei foderneiddio ac yn cyrraedd safonau UEFA yn ogystal â gofynion myfyrwyr Prifysgol Glyndŵr.

Tydi diweddaru'r Cae Ras ddim yn rhywbeth a all ddigwydd dros nos, er mai dyma'r stadiwm gorau yng Nghymru, sydd ddim wedi ei leoli ar arfordir aber yr afon Hafren.

Mae rhywun yn amau nad oes fawr o sylw yn cael ei roi i unrhyw beth, yn enwedig yn y byd pêl-droed, sydd yn gorwedd i'r gogledd o'r M4.

Cafwyd digon o ffwdan y llynedd wrth i'r Gymdeithas Bêl Droed gyhoeddi mai yn Llanelli y byddai rownd derfynol Cwpan Cymru yn cael ei chynnal, gyda nifer o gefnogwyr Bangor yn gofidio teithio mor bell yn ystod gwyliau'r Banc

Cafwyd cefnogaeth wleidyddol hefyd i'w cwyn, felly, gyda'r Cae Ras yn edrych yn flinedig, ond onid dyma'r cyfle i'r rhai sydd mewn grym wrth y Bae i'r De o'r M4, i fynd ati winedd a dannedd i ddwyn perswâd ar eu cyd-aelodau yn y Cynulliad i gyfrannu ychydig tuag at ddatblygiad y Cae Ras a sylweddoli fod yna fwy i fywyd hamdden Gogledd Cymru na cherdded i fyny'r Wyddfa er mwyn cael coffi mewn caffi ar y copa!

Rwy'n edrych ymlaen am gyhoeddiad fyddai'n sicrhau stadiwm deilwng i Ogledd Cymru, un a fyddai hefyd yn sicrhau y gall tref Wrecsam ymfalchïo fod y Cae Ras gyfoes ei gyfanwaith yn disgleirio, yn genedlaethol a rhyngwladol, fel Oen Duw ar fynydd Seion.