Çinin şimal-qərbindəki Urumçi şəhərində müsəlman olan uyğurlar və han millətindən olan çinlilər arasında zorakılığa görə məscidlərin bağlanılmasına əmr verilsə də, bəzi məscidlərin açıldığı xəbər verilir.

Məsələyə dair siyasətin dəyişdiyi və ya məscidlərin, onların qarşısında çox sayda insanların toplaşdığına görə açıldığı hələ bəlli deyil.

Cümə namazında Urumçidə minlərlə uyğurların iştirak edəcəyi gözlənilirdi, lakin rəsmilər şəhər boyu camaatın öz evlərində qalıb ibadət etməsinə göstəriş verən vərəqələr yaymışdır.

BBC müxbiri Urumçidə vəziyyətin gərgin qaldığını deyir.

Ordu qüvvələri hələ də şəhər boyu qalmaqdadırlar.

Ötən bazar günü iğtişaşlar zamanı şəhərdə 150-dən çox adam həlak olmuşdur.