Əli Babacan bildirib ki, bölgədəki problemlərin həllində Azərbaycan və Türkiyənin əməkdaşlığı mühüm rol oynaya bilər.

Türkiyə xarici işlər naziri Əli Babacan Bakıya bir günlük səfərində prezident İlham Əliyev, baş nazir Artur Rasizadə, xarici işlər naziri Elmar Məmmədyarovla görüşüb. Elmar Məmmədyarov təkbətək və geniş tərkibdə keçirilən görüşdən sonra bəyan etdi ki, türkiyəli həmkarı ilə regionda gedən prosesləri müzakirə ediblər.

Əli Babacan isə Azərbaycan və Türkiyənin yerləşdiyi regionda müxtəlif problemlərin mövcud olduğunu dedi. O bildirdi ki, bu problemlərin həlli üçün Türkiyə Qafqazda İstiqlal və İş birliyi Platforması təşəbbüsü ilə çıxış edib və bölgədəki dövlətləri iş birliyinə çağırıb.

“Türkiyə Azərbaycan və Ermənistan arasında münaqişənin həlli üzrə yaradılan Minsk Qrupunun üzvüdür. Türkiyə bu problemin həlli üçün çox çalışır. Gürcüstan və Rusiya, eləcə də, Türkiyə və Ermənistan arasında problemlər var. Bütün bu problemlərin həlli üçün dialoq önəmli rol oynayar”.

Türkiyəli nazir son dövrlər Qafqazda diplomatik təmasların aktivləşdiyini dedi. Onun sözlərinə görə, əgər bölgədəki mövcud problemlər qalsa, sülhə nail olmaq mümkün olmayacaq. O, bu problemlərin gələcək nəsillərə qalmamasını arzu etdiklərini bildirdi.

Əli Babacanın fikrincə, problemlərin həllində Azərbaycan və Türkiyənin əməkdaşlığı mühüm rol oynaya bilər. Bundan başqa, o, Azərbaycan-Ermənistan münasibətlərinin yaxşılaşmasının Türkiyə-Ermənistan münasibətlərinə də müsbət təsir edəcəyini düşündüyünü bildirdi

Bütün bunlarla yanaşı, Əli Babacan “ Türkiyənin Ermənistanla sərhədini Dağlıq Qarabağ münaqişəsinin həllinə qədər açacaqmı ?” sualını cavabsız buraxdı.