Prezident Muqabe

BMT-nin yüksək vəzifəli rəsmisi Afrika liderlərinə onların Zimbabve məsələsi ilə əlaqədar həqiqət anı ilə üz üzə gəldiklərini deyib.

BMT baş katibinin müavini Aşha-Rouz Migiro Afrika Birliyi ölkələrinin Misirdə keçən sammitində deyib ki, Zimbabvedə Robert Muqabenin yenidən prezident vəzifəsinə seçilməsi ətrafında yaranmış böhran olduqça çiddidir.

Cənab Muqabenin özü həmin sammit də iştirak edir və bu çıxışı şəxsən eşidib.

Zirvə görüşünü işıqlandıran BBC müxbiri deyir ki, Muqabenin bu toplantıda iştirak etməsi digər Afrika liderlərini çox pis vəziyyətdə qoymuş olur.

Afrika Birliyinin seçkilər üzrə monitorinq qurumuna görə, ötən cümə günü keçirilmiş seçkilər demokratik standarlardan çox uzaq idi.

Həmin seçkilərdə Muqabe yeganə namizəd idi. Afrika Birliyinin liderləri hazırda tək-bə-tək görüşlər keçirirlər.

Müşahidəçilərin dediyinə görə, onların Zimbabve böhranına münasibəti Afrika Birliyinin nə dərəcədə təsirli bir qurum olduğunu sınağa çəkmiş olacaq.