Rusiyanın baş naziri Vladimir Putin yenidən NATO-nun şərqə doğru genişlənməsi təkliflərinə qarşı kəskin çıxış edib.

Fransaya səfəri zamanı "Le Monde" qəzetinə verdiyi müsahibədə cənab Putin deyib ki, NATO-nun genişlənməsi Avropada yeni maneələr, onun ifadə etdiyi kimi, "yeni Berlin divarı" yaradacaq.

Putinin sözlərinə görə, yeni səddlər bu dəfə gözə görünməsə də, Berlin divarından az təhlükəli olmayacaq.

Rusiya keçmiş Sovet İttifaqı respublikaları olan Ukrayna ilə Gürcüstanın NATO-ya daxil olmasının əleyhinədir.

Vladimir Putin eləcə də deyib ki, o, Gürcüstan prezidenti Mixail Saakaşvilinin Abxaziyaya dair planını bəyənir.

Həmin plan özünü müstəqil elan etmiş Abxaziyaya muxtariyyətin verilməsini nəzərdə tutur.

Bununla belə, Putin açıq bildirib ki, Saakaşvilinin planı Abxaziyanın separatçı liderlərinin də dəstəyini qazanmalıdır.