Rusiyanın aparıcı neft şirkətlərindən biri TNK-BP müştərək müəssisəsinin Rusiyalı səhmdarları şirkətin icraçı direktoru Robert Dudley-ni istefa verməyə çağırıblar.

Son zamanlar TNK-BP şirkəti artan təzyiq hədəfinə çevrilib. Təzyiqin məqsədi bu şirkəti öz səhmlərini dövlətin nəzarətində olan Rosneft və ya Qazprom şirkətlərinə satmağa məcbur etməkdir.

Rusiyalılar Robert Dudley-ni yalnız BP maraqlarını güdməkdə ittiham edirlər. Şirkətdə reydlər keçirilib, əməkdaşlardan biri isə texnoloji cəsusluqda ittiham olunub.

Şirkərkətin xarici əməkdaşları üçün vizaların verilməsində problemlər yaranıb.

İddia edildiyi kimi, vergilərdən yayınmağa görə TNK-BP-nin keçmiş şöbələrindən birinə qarşı istintaq aparılır.

Hazırda şirkətin iki hissəsi arasında, demək olar kı, müharibə gedir.

Təhlilçilər hesab edirlər ki, bu yolla Rusiyalı səhmdarlar TNK-BP-nin dövlət enerji şirkətinin nəzarətinə keçməsinin qarşısını almağa çalışırlar.

Deyilənlərə görə, TNK-BP-nin Rusiya hissəsinə ya Qazprom, ya Rosneft göz dikib.