Narayanhiti kral sarayı

Nepal hökuməti sabiq kral Quanendranın paytaxt Katmandudakı kral sarayından 48 saat ərzində çıxmasına rəsmi göstəriş verib.

Bu həftə xüsusi assambleya ölkədə monarxiya üsul-idarəsini ləğv edib və indi kral sarayının muzeyə çevrilməsi nəzərdə tutulur.

Yeni hakimiyyət eləcə də kral sarayı və kral əmlakının auditini aparmaq üçün xüsusi tapşırıq qrupu yaradıb.

Sabiq kralın bütün əmlakı hökumətin nəzarəti altına keçib.

Saray ətrafında sərt təhlükəsizlik tədbirləri qüvvədə qalmaqdadır.

Dünən respublikanın yaradılmasını qeyd edən nümayişçilər və polis arasında saray yaxınlığında toqquşmalar olub.