Bakı sakinlərini soyuqdan qorumaq üçün sığınacaqlar

Əmək və Əhalinin Sosial Müdafiəsi Nazirliyi "qarlı-şaxtalı hava şəraitinin hökm sürməsi" ilə əlaqədar olaraq Bakı şəhərinin müxtəlif yerlərində səyyar sığınacaqlar təşkil etməsi barədə bəyanat yayıb.

Son həftələrdə düşən güclü soyuqlar 5 insanın ölümünə səbəb olub.

Nazirlik bildirib ki, sığınacaqlarda yaşayış yerinə getməkdə, o cümlədən rayondan Bakıya gələrək yenidən rayona qayıtmaqda çətinlik çəkənlər, açıq havada səyyar iş görənlər, faktiki yaşayış yeri uzaqda olanlar, yaşayış və ya gecələmək üçün yeri olmayanlar (küçə uşaqları, atılmışlar və digərləri), yaxud müvəqqəti isinməyə və ilk yardıma ehtiyac duyan vətəndaşlar 24 saat ərzində yataqla, 3 dəfə isti yemək və çayla, istiliklə, lazım gəldikdə tibbi xidmətlə təmin olunurlar.

Nazirlik sığınacaqların Bakının müxtəlif yerlərində yerləşdiyini bildirsə də, müxbirimiz Şərq bazarının yaxınlığında, Xətai prospekti, 11 ünvanında heç bir sığınacaq qurulmadığının şahidi olub.

Nazirliyin aparat rəhbərinin müavini Elnur Kələntərov Süleyman Rüstəm küçəsində sığınacaqla jurnalistləri tanış edərkən, müxbirimizin bu barədə sualına cavab verərəkən "hər şeydə pozitiv axtarmağı" məsləhət görüb.