BBC müxbiri Azərbaycan "boks rüşvəti araşdırması"nın nəticələrinə inanmır

Beynəlxalq Boks Federasiyasının (AİBA) təyin etdiyi komitə Azərbaycana, 10 milyon dollarlıq sərmayə əvəzindəgələn il Londonda keçiriləcək Olimpiya oyunlarında iki qızıl medal vəd edilməsinə dair iddiaları rədd edib.

AİBA-nın Xüsusi Təhqiqat Komitəsi sentyabrın 23-də yayımlanmış BBC Newsnight proqramında səslənən məlumatları "əsassız və ağlabatan dəlillərlə sübut olunmayan" kimi dəyərləndirib.

Proqrama müraciət edən iki anonim şəxs Azərbaycanın AİBA-ya artıq 9 milyon dollar ödədiyini və əvəzində iki boksçuya Olimpiya medalı vəd olunduğunu bildirmişdi.

Azərbaycan da bu ittihamları rədd etmiş və sərmayə razılaşmasının hakimiyyətə dəxli olmadığını bildirmişdi.

Proqramın aparıcısı Anna Adams BBC Azərbaycancaya müsahibəsində AİBA-nın apardığı araşdırmaya şübhə etdiyini və Beynəlxalq Olimpiya Komitəsinin apardığı təhqiqatın nəticələrini gözlədiyini bildirib.

Müstəqil adlandırdıqları bu araşdırmanı bizim təhqiqatımızda adları hallanan adamlar aparıb. Bu araşdırmanın aparılması üçün komissiya üzvlərini AİBA prezidenti Çin Ku Vu təyin edib. Onun özü sərmayə razılaşmasını imzalayan adamdır. Başqa sözlə, onun təyin etdiyi adamlar onun özünü araşdırmalı idi. Belə bir araşdırma necə müstəqil və tərəfsiz ola bilər – deyə Anna Adams sual edib.