Urmiyada "yeni həbslər olub"

İranda Azərbaycanlı Siyasi Məhbusların Müdafəsi Assosiasiyasının sözçüsü Yaşar Hakkakpur deyir ki, gölün qurumasının qarşısını almaqda dünya ölkələri də maraqlı olmalıdır.

İran ərazisində Urmiya gölünün quruması ilə bağlı İslam Respublikası parlamentinin gölün xilas tədbirlərinin əleyhinə verdiyi qərar Urmiya və Təbriz şəhərlərində azərbaycanlıların etirazları ilə qarşılanıb.

İranda Azərbaycanlı Siyasi Məhbusların Müdafəsi Assosiasiyasının sözçüsü Yaşar Hakkakpurun BBC Azərbaycancaya verdiyi məlumata görə, şənbə günü hər iki şəhərdə yenidən etiraz tədbirləri keçirilib.

Onun sözlərinə görə, polisin Urmiyada insanların toplaşdığı yerə mərmi atmasına dair məlumatlar var.

Kanadadan yaşayan Hakkakpur İrandakı azərbaycanlılarla əlaqə saxladığını deyir. O, son günlər İranda azərbaycanlıların yaşadığı və etriazların baş qaldırdığı ərazidə internet və telefon xətlərinin kəsildiyini söyləyir.

Yaşar Hakkakpur etirazların, siyasi xarakter daşımadığı və ətraf mühit probleminin həllinin tələbi olduğu halda, həbslər və polis basqısı ilə müşaiyət olunmasından təəccübləndiyini deyir.

Urmiya gölünün sahillərində məskunlaşan azərbaycanlılar, gölün quruyacağı təqdirdə onun ətrafında yaşayan insanlara zərər vuracağından qorxduqlarını bidlirirlər.

Məlumatlara görə, avqustun 24-də 30-dan artıq azərbaycanlı Təbrizdə həbs olunub.

İran Parlamenti Urmiya gölünün qurumasının qarşısını almaq üçün Araz çayından su kanalı çəkilməsinə pul ayırmaqdan imtina edib.