bbc.co.uk navigation

London 2012 şəkillərdə

Son yeniləmə: 27 iyul, 2011 - 16:51 GMT

London 2012 kompleksləri

  • Olimpiya Stadionu
    Olimpiya Stadionu Londonun şərqindəki Stratford rayonunda yerləşən Olimpiya Parkının cənub qapısından girənləri salamlayır. Stadionda müvəqqəti oturacaq qatı yerləşdirilib və Olimpiya oyunlarından sonra bu qat götürüləcək. Foto: Jason Hawkes
  • Akvatiks su oyunları mərkəzi
    İraqlı arxitektor Zaha Hadidin dizayn etdiyi Akvatiks su oyunları mərkəzi də müvəqqəti kompleksdir və 2012-ci il Olimpiya oyunlarından sonra oturacaqların yerləşdiyi "qanadlar" götürüləcək.Suya baş vurma və üzgüçülük yarışları burada, su polosu isə digər arenada keçiriləcək. Bütün şəkillər, başqa müəllif qeyd edilənədək Getty / London 2012-ə məxsusdur.
  • Basketbol arenası
    Döşəyə bənzər basketbol arenası Olimpiya oyunları üçün düzəldilmiş ən böyük müvəqqəti komplekslərdən biridir. 20 min kvadrat metrlik, polad çərçivənin üzərinə çəkilmiş ağ plastmas örtüyün altına 12 min adam yerləşir. Olimpiya və Paralimpiya basketbol oyunlarından savayı, burada həmçinin həndbol yarışlarının finalı keçiriləcək.
  • Velodrom
    Velodrom Olimpiya parkında tikintisi 2001-ci ilin fervralında başa çatdırılan ilk kompleks idi. Trek Sibir şamından düzəldilib, bayırdan isə qırmızı sidr ağacının taxtasından lövhə vurulub. BMX treki onun yaxınlığındadır.
  • Xokkey mərkəzi
    Xokkey mərkəzi Olimpiya parkının şimal-qərb küncündə yerləşən müvəqqəti arenadır. Onun içərisindən Olimpiya parkı və London görünür. Arenada həmçinin Paralimpiya futbol oyunları keçiriləcək. Şəkil- Populous.
  • Həndbol Arenası
    Həndbol Arenası 2011-ci ildə Olimpiya sınaq tədbiri keçirib. İçəridə oturacaqlar parlaq rənglərlə cilalanıb, binanın eksteryeri isə mis örtüdən hazırlanıb. Örtünün böyük hissəsi atılmış mis tullantılarından istehsal olunub. Arenada həmçinin Olimpiya qılıncoynatma və Paralimpiya qolbol oyunları keçiriləcək.
  • Olimpiya parkı
    Yarışların böyük hissəsi Olympiya Parkından kənarda, London və başqa şəhərlərdə keçiriləcək. Şəhərin mərkəzindəki Hyde Park-da triatlonçular yarışacaqlar. Onlar yarışın üzgüçülük mərhələsini Serpentine adlanan yerdə keçirəcəklər. Elə oradaca açıq havada üzgüçülük marafonu təşkil ediləcək.
  • Süvari Qvardiya Paradı
    Hökumət idarələrinin yerləşdiyi Whitehall-un mərkəzindəki Süvari Qvardiya Paradında isə çimərlik voleybolu üzrə birincilik keçiriləcək. London 2012-nin təşkilatçıları deyirlər ki, şəhərdə müvəqqəti idman obyektləri quraşdırmaqla oyunların Londonun ən görməli yerlərinin fonunda keçirilməsinə və bununla da şəhərin təbliğinə nail olacaqlar. Foto: PA
  • Lord's kriket stadionu
    Oxatma üzrə turnir Lord's kriket stadionunda keçiriləcək. İdmançılar Pavilyon binası və Media Mərkəzi arasındakı məsafədə yarışacaqlar. Hər ehtimala qarşı indidən stadionun rəhbərliyi ota dəyən ziyanı Olimpiadadan sonra aradan qaldırmağa hazırlaşır və indidən ehtiyat ot yetişdirir.
  • Greenwich Parkı
    Londonun cənub-şərqində, Dünya İrsi siyahısına düşmüş Greenwich Parkı atçılıq və müasir pentatlon üzrə yarışlara sahiblik edəcək. İdmançılar atsürmənin müxtəlif növləri üzrə bacarıqlarını parkda nümayiş etdirdikdən sonra, 17-ci əsrdə inşa edilmiş Kraliça Evinin qarşısındakı meydançaya atılacaqlar.
  • Kral Artilleriya Kazarmaları
    Londonun Woolwich limanının qədim hərbi tarixçəsi var. Burada yerləşən Kral Artilleriya Kazarmalarının inşasına 1776-cı ildə başlanmışdı. Atıcılıq üzrə Olimpiya və Paralimpiya turniri, eləcə də Paralimpiadanın oxatma yarışları məhz burada keçiriləcək.
  • Hampton Court
    Şəhərin başqa bir hissəsində, VIII Henrinin Hampton Court sarayında isə velosiped ötüşmələrinin start və finiş xətti olacaq. Velosipedçilər Surrey qraflığındakı Esher şəhərindən və Londonun cənub-qərbindən keçərək bura qayıdacaqlar.
  • Wimbledon tennis kortları
    Elə Londonun cənub-qərbindəki dünya şöhrətli Wimbledon tennis kortlarında Olimpiya Oyunlarının tennis turniri təşkil ediləcək. Tennisçilər iyulun 28-dən avqustun 5-ə kimi burada qüvvələrini sınayacaqlar.
  • Wembley Stadionu
    Yuxarıdan və soldan saat əqrəbinin istiqaməti üzrə - Wembley Stadionunda futbol, Wembley Arenada isə badminton və ritmik gimnastika yarışları keçiriləcək; Excel-də boks, qılıncoynatma, cüdo, stolüstü tennis, taekvondo, ağırlıqqaldırma və güləş; North Greenwich Arenada bədii gimnastika, batut və basketbol; Earls Court-da voleybol yarışları olacaq.
  • Dorney Lake gölü
    Londonun kənarında da bir sıra idman tədbirləri keçiriləcək. Windsor yaxınlığındakı Eton Dorneydəki Dorney Lake gölündə 2012-ci il Olimpiadasının avarçəkmə yarışları təşkil olunacaq.
  • Hadleigh Farm
    Dağüstü velosiped sürmə üzrə dünyanın ən yaxşı idmançıları Olimpiadanın son həftəsonunda Essex-dəki Hadleigh Farm yaşayış məntəqəsinin yaxınlığındakı təpələrdə güclərini sınayacaqlar.

More Multimedia

Other BBC sites

BBC © 2012 BBC kənar saytların məzmunu üçün məsuliyyət daşımır.

Bu səhifə veb-brauzerlərin kaskadlaşan üslub cədvəlləri (CSS) sistemi ilə dəstəklənmiş son versiyaları vasitəsilə daha yaxşı baxılır. Brauzerinizin mövcud versiyası sizə səhifənin əsas məzmununu göstərə bilər, lakin bəzi elementlər görünməz qalacaq. Səhifəyə baxışı tənzimləmək üçün brauzerinizin yeni versiyasını yükləməlisiniz, əks halda CSS dəstəyindən istifadə etmək lazımdır.