Rusiya Qəbələ Stansiyasının icarəsini uzatmaq istəyir

Rusiyanın müdafiə naziri Anatoli Serdyukov bildirib ki, ölkəsi RLS-in icarə ərazisinin azaldılması və stansiyanın yeniləşdirilməsində maraqlır.

Bundan əvvəl Moskva Bakı ilə mövzunun müzakirə olunduğunu bildirib.

Qəbələ Stansiyasının icarə müddəti 2012-ci ilin sonunda başa çatır.

Rusiyanın hərbi idarəsi Stansiyanın icarəsinin 2025-ci ilədək uzadılmasına və onun yenidən qurulmasına çalışdığını bildirib.

Jurnalistlərin suallarına cavab verən Anatoli Serdyukov stansiyanın, o cümlədən, İranla bağlı istismarını qeyd edib, deyilir İTAR-TASS agentliyinin məlumatında.

“Qəbələnin imkanlarının genişlənməsi erkən raket hücumu ilə bağlı xəbərdarlıq sistemi üçün faydalı və mühümdür. Bu o cümlədən İranın (raket) proqramı ilə bağlıdır. Hərçənd ki, biz bunun əlaqələndirməyirik”

Stansiyanın yeniləşməsi

"Razılaşma əldə edə bilməməyimizə dair heç bir narahatlığım yoxdur"

Anatoli Serdyukov, Rusiyanın müdafiə naziri

“Çox güman ki, bu stansiya zavodda hazırlanaraq bilavasitə Qəbələdə montaj olunacaq”, - RİA Novosti agentliyində Rusiyanın müdafiə nazirinin sözlərindən iqtibas gətirilir.

APA agentliyinin məlumatına istinadən nazir Qəbələnin imkanlarının genişlənməsi və parametrlərinin müasirləşməsinə çalışıldığını deyərək icarə xərclərinin aşağı salınmasında maraqlı olduğunu bildirib.

“Yeni stansiya qurulduqdan sonra bizə bu qədər ərazi lazım deyil. O zaman bizə su və elektrik enerjisi də indiki qədər lazım olmayacaq. Azərbaycanlı həmkarımla yaxın vaxtlarda işçi qrup səviyyəsində müzakirələrin Bakıda davam etdirilməsi barədə razılığa gəlmişik. Razılaşma əldə edə bilməməyimizə dair heç bir narahatlığım yoxdur”.

Rusiyanın Müdafiə Nazirliyi Azərbaycanla razılaşdırılacaq yalnız maliyyə məsələlərinin qaldığını deyib.

İndiyədək Bakı stansiyanın haqqını artırılmaq niyyətində olub.

Bakıdan baxış

"Azərbaycan icarə haqqının artırılmasını təkid etsə də, Rusiya sırf pul deyil, xidmət şəklində ödənişləri təklif edir"

Üzeyir Cəfərov, hərbi ekspert

Azərbaycan Müdafiə Nazirliyinin sabiq işçisi, hərbi ekspert Üzeyir Cəfərov deyir ki, bu məsələnin həlli üçün yeni ödəniş üsulları təklif oluna bilər:

“Azərbaycan icarə haqqının artırılmasını təkid etsə də, Rusiya sırf pul deyil, xidmət şəklində ödənişləri təklif edir. Buraya təlim kimi proqramlar daxildir”.

Ekspertin sözlərinə görə Qafqazda yeni Armavir RLS-nin qurulmasından sonra "daha yaşlı" olan Qəbələnin əhəmiyyəti bir qədər azalıb.

2007-ci ildə Qəbələ stansiyanın ABŞ-la birgə istismarı təklifi ortalıqda olsa da, Vaşinqton Avropanın havadan müdafiə sisteminə Azərbaycandakı lokatoru daxil etməmək qərarına gəlib.

Qəbələ stansiyasında müqaviləyə əsasən 1.500 adam işləyir. Onların arasında yerli personal da var.

Yer və dənizdən qalxan ballistik raket hücumundan erkən xəbərdarlıq stansiyası olan Qəbələ 1985-ci ildə istismara verilib.

Hazırda Azərbaycandakı stansiyadan 6 min kilometrlik məsafəni nəzarət altında saxlamaq mümkündür.

RLS-in nəzarət əhatəsinə İran, Türkiyə, Çin, Pakistan, Hindistan, İraq, Afrikanın bir hissəsi və Hind habelə Atlantik okeanında olan adalar daxildir.